Den Donneschdeg gouf et op de Stroossen dräi Accidenter mat Fahrerflucht. Zu Dikrech an um Lampertsbierg goufe Foussgänger ugestouss a blesséiert.

Den Donneschdeg de Moien ass géint 8.10 Auer ee Foussgänger op engem Zebrasträife virum Lycée Michel Lucius um Lampertsbierg vun engem klenge wäissen Auto ugefuer ginn. Den Auto hat méiglecherweis lëtzebuergesch Placken. Den ugefuerene Foussgänger gouf blesséiert, mee den Automobilist huet sech nom Accident duerch d'Bascht gemaach.

D'Police sicht an deem Zesummenhang no Zeien, déi Informatiounen zum Accident an zum Auto kënne ginn. All Hiweiser si fir de Policebüro zu Walfer ënnert der Nummer (+352) 244 41 1000 oder per Mail u police.walferdange@police.etat.lu.

Zwee Accidenter mat Fahrerflucht zu Dikrech

En Donneschdeg koum et géint 17 Auer zu Dikrech zu zwee Accidenter mat Fahrerflucht. A béide Fäll war e schwaarze BMW mat Lëtzebuerger Placken involvéiert.

Beim éischten Accident an der Rue Guillaume ass et bei Materialschued bliwwen. Bei deem zweeten Accident gouf eng Foussgängerin ugefuer. D'Fra gouf blesséiert an an d'Spidol bruecht.

A béide Fäll huet de Chauffer sech duerch d'Bascht gemaach. Hie konnt awer méi spéit ermëttelt ginn.

Eventuell Zeien, déi eppes zu den Accident soe kënnen, solle sech beim Policebüro zu Dikrech ënnert dem +352 244 80 1000 oder per Mail op police.diekirchvianden@police.etat.lu.