E Freideg war de Regierungsrot beieneen, fir de Point iwwert d'Corona-Situatioun ze maachen. E Méindeg kënnt d'Regierung eng weider Kéier beieneen.

Genee wéi an aneren EU-Länner, wéi zum Beispill an der Belsch an an Holland, kéint et och hei am Land nees zu verschäerften Anti-Covid-Restriktioune kommen. Deemno war d'Regierung e Freideg beieneen, wou de Point vun der aktueller Corona-Situatioun gemaach ginn ass an och éischt Entscheedunge getraff goufen.

D'Gültegkeet vu PCR-Tester soll vun 72 op 48 Stonnen erofgesat ginn an déi vun zertifiéierte Schnelltester vun 48 op 24 Stonnen. Am Laf vun der nächster Woch wäert dës Ännerung a Kraaft trieden.

An der Educatioun kënnt et dann och zu neie Mesuren. Ënnert anerem wäerten an Zukunft amplaz 2 Mol d’Woch 3 Mol d'Woch Schnelltester duerchgefouert ginn.

Ännerunge sollen dann och an den Alters- a Fleegeheemer kommen. Nieft dem 3G soll fir Visiteuren elo och nees eng Maskeflicht kommen et sollen och nees Schnelltester gemaach ginn. D'Copas huet sech an engem Schreiwes e Freideg am Nomëtteg och scho fir méi strikt Mesuren ausgeschwat.
Am Regierungsrot gouf sech dann och dofir ausgeschwat, datt d'Homeoffice-Méiglechkeet an der Fonction publique nees op 4 Deeg an d'Luucht gesat gëtt. Aktuell sinn et 3 Deeg pro Woch.

E Méindeg kënnt de Regierungsrot nees beieneen. No engem Austausch mat de Sozialpartner sollen da weider Mesuren decidéiert ginn. Et kéint deemno duerchaus sinn, datt mat weidere Mesurë probéiert gëtt, d'Zuel vun de Kontakter nees ze limitéieren a grouss Evenementer besser ze cadréieren. Rieds geet aktuell vun enger exponentieller Dynamik, déi d'Corona-Neiinfektioune mëttlerweil erreecht hätten. Deemno misst géigegesteiert ginn. Suerge mécht och den Impftaux, deen aktuell stagnéiert. Dat aktuellt Covid-Restriktiounsgesetz leeft u sech eréischt den 18. Dezember aus. Et kéint deemno sinn, datt et ewell virun dësem Datum en neie Gesetzestext gëtt, deen an d'Chamber geet.

Um 17 Auer e Méindeg informéieren de Premier Xavier Bettel an d'Gesondheetsministesch Paulette Lenert op enger Pressekonferenz iwwert d'Aarbechten am Regierungsrot. D'Pressekonferenz kënnt Dir live op der Tëlee, um Radio an am Stream op RTL.lu suivéieren.