D’Kanner stäerken, mä och d’Elteren, si ënnerstëtzen, d’Betreiung, méi Zäit ee fir deen aner, psychologesch Hëllef oder d’Gefore vum Handy ware Sujeten.

D’Wuelbefanne vun de Kanner a Jugendlecher stoung e Mëttwoch an der Chamber am Mëttelpunkt. D’CSV an de Serge Wilmes haten d’Interpellatioun gefrot.

Debatt iwwer d'Wuelbefanne vun de Kanner / Reportage Carine Lemmer

D’CSV wëll, dass de Bien-Être vun de Kanner an de Jugendlechen een zentraalt Zil vun der Politik soll ginn. Eng zentral Offer mat alle Servicer an Hëllefsstellunge fir d’Eltere wärend den éischten dräi Joer vun hirem Kand kéint dofir suergen, dass méi einfach kann no Hëllef gefrot ginn. Ausserdeem sollten d’Eltere méi Zäit kënne mat hire Kanner verbréngen, ouni finanziell dofir bestrooft ze ginn. Eng méi adaptéiert Work-Life-Balance wier eng Iddi, mat zum Beispill méi Deelzäit-Aarbecht, wa méiglech.

De Serge Wilmes

Virun allem elo an der Pandemie wier d’Thema vum Wuelbefanne vun de Kanner an de Jugendlechen immens wichteg. Ma net nëmmen dowéinst, mee och generell gëtt d’Welt ëmmer méi komplex, wat eng Erausfuerderung fir déi jonk Generatioun kéint ginn.

Wichteg wier et dann och d’Schoulen ze stäerken, fir dass si hir Roll als Ënnerstëtzung fir d’Kanner kann ausüben. Donieft misst dann och méi iwwer d’Risiken an de soziale Medien opgekläert ginn, sou d'CSV.