Aus dem Plang, datt och an den Apdikten de Covid-Vaccin soll kënne gesprëtzt ginn, kéint deemno wéi nach esou bal näischt ginn.

De Staatsrot stellt nämlech a sengem Avis iwwert den entspriechende Gesetzesprojet eng ganz Partie kritesch Froen a stellt eng komplett juristesch Onsécherheet vum Text fest.

Et wiere pertinent Froen, déi sech d'Auteure wuel entweder net gestallt hätten oder einfach d'Zäit net haten, fir se sech ze stellen. D'Regierung hätt wëlle séier en Text deposéieren, datt och an den Apdikte ka geimpft ginn, esou datt do och de Rappell gesprëtzt ka ginn, fir datt d'Impfcampagne vun der Plaz kënnt.

Impfungen an den Apdikten / Roy Grotz

De Staatsrot mécht deem Projet elo mol e virleefege Stréch duerch d'Rechnung a stellt sech queesch: alt nees géif en Text presentéiert ginn, deen an der Hetz verfaasst gouf a méi Froen opléist, wéi Léisunge presentéiert.

D'Membere vum héije Gremium stellen eng komplett juristesch Onsécherheet vum kuerzen Text fest a schwätzen duerfir eng formell Oppositioun grad wéi e méigleche Refus vun der Dispens vum zweete konstitutionelle Vott aus.

Esou wier dem Staatsrot no komplett onkloer, wéi d'Formatioun vun den Apdikter soll oflafen, fir kënne Vaccinen ze sprëtzen, wéi d'Vaccinatioun dem Apdikter bezuelt gëtt a wéi dëst an der Nomenclature mat der CNS soll festgehale ginn.

Et wier dann och net gereegelt, ob de Patient virun der Impfung an der Apdikt nach soll bei sengem Dokter passéieren an ob den Apdikter eng entspriechend Preuve muss froen.

De Staatsrot proposéiert, fir den entspriechende Gesetzesprojet nach emol komplett mat der néideger Suergfalt a Prezisioun ze iwwerschaffen, amplaz en ënner Zäitnot duerchzedrécken.

D'Apdikte solle fräiwëlleg kënnen un engem entspriechende Vaccinatiounsprogramm deelhuelen an et misst och obligatoresch sinn, datt de Patient virdru bei sengem Dokter passéiert.

Mam Bléck op d'Ausland seet de Staatsrot, datt et an Däitschland nëmme géife vereenzelt Pilotprojete vu Grippe-Vaccinatiounen an Apdikte ginn, an der Belsch géif zu Bréissel am Kader vum Projet "pharma on tour" de Vaccin exklusiv vu medezineschen Ekippen injektéiert ginn an a Frankräich wier souguer de materielle Kader definéiert, wou d'Impfung ze geschéien huet. All dëst gëtt am Gesetzesprojet vermësst.

Gefrot gëtt sech am Avis och, firwat dann nëmmen d'Apdikter mam Text viséiert sinn an net och zum Beispill Kinéen, Personal vun den ambulante Fleegeservicer, Infirmieren an Hiewane kënnen de Vaccin administréieren.

Impfen an den Apdikten: D’Apdikter sinn nach net forméiert dofir

Kritik vum Apdikter-Syndikat / Reportage Diana Hoffmann

D’Iddi, datt d’Apdikte solle beim Impfe vum Anti-Covid-Vaccin hëllefen, schéngt an noer Zukunft keng Realitéit ze ginn. De Staatsrot huet a sengem Avis zum entspriechende Gesetz eng ganz Partie Umierkungen a Kriticke geäussert. De President vun de Lëtzebuerger Apdikter, den Alain De Bourcy deelt dës. Ma wann de Staatsrot op ee ganz bestëmmte Punkt géing bestoen, wier de ganze Projet souwisou vu vir eran hifälleg.

Fir datt déi Leit, déi wëllen elo sou séier wéi méiglech hir Booster-Impfung kréien, kéint et hëllefen, wann dës géing op méiglechst ville Plaze ugebuede ginn. Zum Beispill eben an den Apdikten. De President vum Syndicat vun de Lëtzebuerger Apdikter, den Alain de Bourcy, huet awer Versteesdemech fir d’Kriticke vum Staatsrot.

"De Problem ass, datt impfen bis elo net an eisen Attributiounen ass. Do soll elo eng Gesetzesännerung kommen, datt d’Apdikter dat och däerfe maachen. Dofir ass den Avis beim Staatsrot. D’Fro ass déi, wat geschitt, wann ee Patient eng grave Reaktioun op de Vaccin mécht?  D’Medezinner sinn dofir forméiert, fir och Noutfallmedezin no enger Vaccinatioun ze maachen. Ass dat deem gläichzestellen, wat d’Apdikter kënne maachen, wa se eng Formatioun kréie vun e puer Stonnen?“

Et wier awer natierlech keng Saach vun der Onméiglechkeet, fir Impfungen an den Apdikten unzebidden. An anere Länner ginn zum Beispill d’Grippeimpfungen do gemaach. Wat natierlech och kéint aus demografesche Grënn sinn, wéi den Apdikter uféiert. Mee am Avis géing de Staatsrot duerch ee Punkt deem ganze Projet schonns quasi vu fir eran e Stréch duerch d’Rechnung maachen.

De Staatsrot seet, datt et virdrun eventuell ubruecht ass, datt de Patient bei den Dokter geet. Ma da froen ech mech, firwat mécht den Dokter net d’Impfung, wann e schonn de Patient a sengem Cabinet an der Consultatioun huet. Ech gesinn net d’Valeur ajoutée dobäi, wann den Dokter soll eng Consultatioun rechnen, fir dann de Patient an d’Apdikt ze schécken, fir datt den Apdikter en dann impft.

Den Alain De Bourcy wëll dann awer och kloerstellen, datt et net d’Apdikter waren, déi d’Demande gestallt hunn, fir kënnen ze Impfen. Op Ufro hin vun der Regierung wier d’Santé op si duerkomm, wéinst der schlechter epidemiologescher Situatioun.

"D’Regierung hätt gären, datt mer den Taux vu geimpfte Persounen an d’Luucht sëtzen. Si huet gefrot, op mir bereet wieren, do ze hëllefen a sou méi Plazen ubidden, wou ee sech kann impfe loossen. Mir hu gesot, wa mer gebraucht ginn, hëllefe mer gären, da si mer disponibel a sinn och oppen fir Diskussiounen.

Fest steet fir hien awer och, datt d’Lëtzebuerger Apdikter aus dem Dossier Impfen an den Apdikten eraus sinn, wann et dobäi bleift, datt d’Leit musse fir d’éischt beim Dokter passéieren. Dat géing nämlech kee Sënn maachen.