Op de Chrëschtmäert uechter d’Land preparéiert ee sech op den 2G-Regime.

D'Gemeng Déifferdeng wëll vun e Méindeg u mam méi strenge System schaffen - virausgesat awer, datt déi nei Funktioun vun der CovidCheck-Applikatioun fir den Handy deen Ament dann och scho fonctionéiert, wéi mir op Nofro gesot kruten. An Zukunft soll ee kënnen tëschent "Loisir", also 2G, an "Aarbecht", also 3G, kënne wielen an der App. Zu Esch da mussen d'Leit vun e Mëttwoch u scho weisen, ob se geimpft oder nees gesond sinn, wa se op de Chrëschtmaart wëllen. Op Nofro heescht et aus dëser Südgemeng, datt d'Sécherheetsfirma de Leit hiren Zertifikat géing kucken, fir erauszefannen, ob se geimpft oder nees gesond sinn, esou den Escher Buergermeeschter Georges Mischo.

Georges Mischo iwwer de Chrëschtmaart/Reportage Fanny Kinsch

"Den Update vun der App ass jo nach net do, fir dat alles kënnen esou ze kontrolléieren, dass een et direkt um Handy gesäit. Dofir hu mer elo mat der Sécherheetsfirma Kontakt opgeholl, fir dass si den Zertifikat genee kontrolléieren, fir dass ee gesäit, ob ee wierklech geimpft ass oder genesen ass, fir kënnen op eise Chrëschtmaart ze kommen."

Gëllt dat just fir de Chrëschtmaart oder gëtt dat och nach op anere Plaze bei Iech an der Gemeng ëmgesat?

"Nee, et ass am Fong elo just de Chrëschtmaart, well do wierklech méi Leit zesummekommen, soss ass et jo nach esou, dass déi Saachen en vigueur sinn, déi bis elo am Gesetz sinn, iert dat neit Gesetz kënnt. Dofir, mir wollte reagéieren, well de Chrëschtmaart wierklech ganz gutt leeft zu Esch, fir dass mer do net een a Gefor setzen. Et ass och just op der Stadhausplaz, well op der Brillplaz hu mer keng gréisser Plaz, wou méi Leit zesummekommen. En plus ass et och esou, datt mer hei op der Stadhausplaz kee Lokal hunn oder kee Chalet hunn, wou een erageet, fir eppes z'iessen oder ze drénken a wou dann zougemaach gëtt. Et ass alles ëmmer op 4 Säiten op."

A fir elo, wou et nach net déi nei Funktionalitéit op der App gëtt, den 2G esou ze kontrolléieren, dat ass méiglech mam aktuelle gesetzleche Kader?

"Jo, also et ass e bësse méi streng nach, et ass jo besser, et ass een e Strapp méi streng nach wéi d'Gesetz, mee wéi gesot, d'Sécherheetsfirma weess elo, wat se ze dinn huet an da waarde mer eben op d'Gesetz, dass dat dann alles a Kraaft kënnt, mee et ass näischt, wat verbitt, fir et nach méi streng ze maachen. Et ass jo och ënnert der Responsabilitéit vum Buergermeeschter, dee jo ëmmer fir d'Securitéit an enger Stad zoustänneg ass an dofir kann een dat sou ëmsetzen."

Esouwäit den Escher Deputé-Maire Georges Mischo um Mikro vum Fanny Kinsch.

An der Stad Lëtzebuerg ännert sech de Regime um Chrëschtmaart elo nach net vun 3G op 2G – wéi et op Nofro heescht, géing een déi nei Covid-Mesuren analyséieren, wann de prakteschen Detail bis bekannt ass.