D'Gesondheetsministesch war e Freideg den Owend am Interview am Journal op der Tëlee.

D'Gesondheetsministesch Paulette Lenert huet déi aktuell Covid-Situatioun am Interview op Tëlee Lëtzebuerg dramatesch genannt a gesot, et géif den Ament drëms goen, fir d'Well gedréckt ze behalen.

D'Mesuren, déi d'Regierung am Kampf géint de Virus e Méindeg annoncéiert huet, géifen awer schonn hir Wierkung weisen. D'Zuel vun de Leit, déi sech fir d'éischt impfe loossen, wier virun der Annonce bei ongeféier 300 den Dag gewiescht. Dono hätt dee Chiffer sech verdräifacht*.

2G am Fräizäitberäich, 3G op der Schaff, jo et wiere sec Mesuren, mä se géifen och nach eng gewëssen Normalitéit zouloossen. Kloert Zil ass et, mat deene Moossnamen e komplette Lockdown ze verhënneren an d'Regierung geet den Ament dovunner aus, datt déi Mesuren och streng genuch sinn, esou d'Gesondheetsministesch Paulette Lenert.

"Sécher kann een ni sinn. Parallel mussen och d'Impfungen unzéien. Et geet eis drëm, nach méi Leit geimpft ze kréien, fir dass mer deen Taux global eropkréien an de Virus ze drosselen. Mir gesinn am Ausland wéi staark en zirkuléiert an dofir brauche mer déi zwou Saachen. Mir brauchen d'Impfung an d'Mesuren."

Fir mat den Impfunge séier virun ze kommen, gouf um Freideg annoncéiert, datt den Impfzenter um Findel erëm opgeet. De geneeën Datum gëtt matgedeelt, soubal confirméiert ass, datt eng gréisser Liwwerung Vaccin op Lëtzebuerg kënnt. Den Impfstoff, seet d'Paulette Lenert, géif awer nach fir déi nächst Wochen duergoen.

Déi éischt Kanner kënnen ëm den hallwen Dezember geimpft ginn. Do bleiwen awer nach verschidden Decisiounen ze huelen.

"Mir hunn éischt Richtlinnen elo kritt vum Conseil superieur des maladies infectieuses (CSMI), dee sech ausgeschwat huet, d'selwecht wéi a Frankräich an an Däitschland. Déi positiv Nouvelle ass, datt déi Kanner, déi op d'Impfung ugewise sinn, prioritär kënne geimpft ginn. Dat ass schonn emol eng gutt Nouvelle. Mir wäerten eis awer déi aner Woch an der Regierung definitiv festleeën, ob mer 1:1 den Avis vum CSMI ëmsetzen oder scho bësse méi wäit ginn, wéi dat elo ugeduecht ass."

Bësse méi wäit goen, kéint zum Beispill bedeiten, datt alleguer d'Kanner kéinte geimpft ginn. D'Paulette Lenert seet, dat wier eng theoretesch Méiglechkeet.

*De leschten Rapporten vun der Santé no louchen d'Zuele vun de Leit, déi fir d'éischt geimpft goufen, virun der Annonce bei ongeféier 400, dono bei ongeféier 700.