Et wier eng drénglech Situatioun, ma et géif ee bedaueren, datt et iwwerhaapt esou weit huet misste kommen.

Et wier falsch ze soen, datt den OGBL de generaliséierte CovidCheck am Betrib géif begréissen, esou d‘President Nora Back en Dënschdeg de Mëtteg no enger Sëtzung vum nationale Comité. Den OGBL hätt esou eng Mesure ni verlaangt. Et géif een awer d‘Entscheedung vun der Regierung an d‘Responsabilitéit, déi se am Kader vun den aktuelle Chifferen iwwerholl huet, respektéieren.

D'Nora Back vum OGBL

Et sinn haart Decisiounen, mee e weidere Lockdown hätt vill méi fatal Konsequenze fir vill Aarbechtsplazen. Et misst ee sech awer bewosst sinn, datt d‘Inegalitéite wuessen. Et riskéiert een, an déi falsch Richtung ze rutschen – e weideren Déifpunkt gouf et e leschte Samschden, esou d'Presidentin vum OGBL, Nora Back.

Den OGBL begréisst, datt et par Rapport zum Gesetz vum 18 Oktober e richtege Sozialdialog gouf. An deem gouf jo festgehalen, datt Entreprisen den 3G op fräiwëlleger Basis kéinten aféieren. Et géif genuch Zäit bleiwen, fir déi lescht oppe Froen an déi konkret Ëmsetzung op der Aarbechtsplaz ze diskutéieren, well déi nei Mesure eréischt de 15. Januar a Kraaft trëtt.

Fir den OGBL géif et weider déi iewescht Prioritéit bleiwen, datt d‘Feele vum CovidCheck net zu Kënnegunge feieren dierft. Genau dat Personal dierft och hir Securité Sociale net verléieren. Dat géif mam neie Gesetz och gesetzlech niddergeschriwwe ginn.

D'ALEBA bedauert iwwerdeems en Dënschdeg an engem Schreiwes, net zesumme mat deenen aneren nationale Syndikater un de Verhandlungsdësch geruff ginn ze sinn. De Bankesyndikat betount nach emol, den Télétravail - wou e méiglech ass - wier déi besser Alternativ zum 3G. Ongeimpften Employéen, déi net vun Doheem schaffe kënnen, sollten hir Corona-Tester vum Patron bezuelt kréien. Duerch dës Mesure kéint een eng Diskriminatioun evitéiere de "soziale Fridden" an der Entreprise garantéieren.

Och d'Energiepräisser waren Thema

Op senger nationaler Comités-Sëtzung huet den OGBL weider méi fair Kompensatioune gefuerdert. Virun allem d‘Energiepräisser maache weider Suergen a wiere kontraproduktiv, fir d‘Kafkraaft vun Deeler vun der Populatioun ze ënnerstëtzen. Vill Menagen hätte manner Suen ewéi virdrun. De Chômage Partiel, eng 80 Prozent vun der Paie, hätt Deeler vun der Populatioun kuerz-, respektiv laangfristeg an de Portmonnie geschloen. Eng Deckelung vun den Energiepräisser wier néideg, esou d‘Presidentin vum OGBL Nora Back.

Eis Regierung seet eis dat wier net esou einfach. Mir gesinn awer, datt et ka goen, zum Beispill a Frankräich a Spuenien, déi do kloer Decisioune geholl hunn a d‘Präisser deckelen. Dofir fuerdere mir als OGBL och fir 2022 eng weider Verdueblung vun der AVC, der Allocation de vie chère. Mir sinn nach an der Kris.“

E Sujet och e Méindeg op der Tripartite. Eng Invitatioun déi e bësse spéit kënnt, bedauert den OGBL. Souwuel d'Covid-Gesetz an d'Budgetsgesetz ginn déi Woch gestëmmt. Et wier am Fong schonn alles decidéiert. Et hofft een awer op en Dialog an en Debat – kee Monolog vun dräi verschiddene Parteien, esou nach d‘Nora Back.