E Mëttwoch den Owend huet sech op enger Reunioun vun der LSAP-Sektioun vun Dikrech decidéiert, wien de Buergermeeschterposten iwwerhëlt.

Zu Dikrech gouf een neie Buergermeeschter gebraucht, dat nodeems de Claude Haagen jo am Januar fir de Romain Schneider an d’Regierung réckele wäert.

De Mëttwochowend ass dunn d'Decisioun gefall, datt den zweete Schäffe Claude Thill an Zukunft d’Geschécker vun der Nordgemeng wäert leeden. De Claude Daleiden réckelt als Schäffen no an d'LSAP-Fraktioun an der Gemeng gëtt vum Fränk Link komplettéiert.

RTL

De Claude Haagen gëtt nächst Joer Minister. / © RTL-Archivbild

Den zukünftege Buergermeeschter huet no der Reunioun vun der Dikrecher LSAP-Sektioun annoncéiert an der Kontinuitéit virun ze schaffen: "Mir wäerten hei zu Dikrech als LSAP-Ekipp viru fuere mat där Politik wéi mer se elo all déi Jore gemaach hunn. Dat heescht u sech ännert duerch de Changement am Schäffen- an am Gemengerot vun der Fraktioun vun der LSAP Programm-méisseg net vill. Mir hunn eise Programm opgestallt a mir wäerten dee bis zu den nächste Walen ëmsetzen. Fir mech perséinlech ännert sécherlech den Zäitopwand e bëssen, mä ech si laang genuch dobäi, weess wat op mech zou kënnt an ech freeë mech dorobber."

Claude Thill, neien Dikrecher Buergermeeschter

Hien hätt och guer net laang missten iwwerleeën op en de Poste vum Buergermeeschter géif unhuelen, sot de Claude Thill gëschter Owend. Dat wier jo heiansdo d'Zil op dat ee géif hischaffen.

Am Schäfferot stinn him de René Kanivé an de Claude Daleiden zur Säit, dee bis elo fir d'LSAP am Gemengerot war. Do gëtt déi sozialistesch Fraktioun duerch de Fränk Link ergänzt. Hien hat bei de leschte Gemengewalen 2017 als 9. op der LSAP Lëscht ofgeschnidden, mat genee 1.000 Stëmmen.