Op enger Pressekonferenz vun der CSV en Donneschdeg huet d'Partei Transparenz am Dossier "SuperDrecksKëscht" an e biergernot Naturschutzgesetz gefuerdert.

CSV-Fraktioun wëll Transparenz am Dossier "SuperDrecksKëscht"

Op der Pressekonferenz huet d'Oppositiounspartei e Finanzéierungsgesetz fir de Vertrag tëscht der Ëmweltverwaltung an der Entreprise ''Oeko-Service Luxembourg'' gefuerdert. De bestoende Kontrakt hätt keng legal Basis, hunn d'Deputéiert Diane Adehm a Gilles Roth beklot. Dofir misst deen elo nodréiglech regulariséiert ginn, mat engem kloer fixéierte Montant. Déi juristesch Avise vun der „Cellule scientifique“ vun der Chamber an vun engem onofhängegen Affekot géifen op deem Punkt iwwertenee stëmmen.

Gilles Roth iwwer Dossier "SuperDrecksKëscht"

Den aktuelle Kontrakt géif géint den Artikel 99 vun der Constitutioun verstoussen. Doran ass festgeluecht, dass et e Spezialgesetz brauch, wann de Staat sech iwwer méi Joren zu Ausgabe verflicht, déi d'Zomm vu 40 Milliounen Euro depasséieren. Bei der „SuperDrecksKëscht“ ass Béides de Fall.

Anescht ewéi d'Juristen am Ëmweltministère et gesinn, ass och d'Gesetz vun 2005 op deem eben den aktuelle Kontrakt baséiert, der CSV no kee Spezialgesetz well kee Budget doran ze fannen ass.

Dofir fuerdert d‘CSV elo, dass d'Gesetz vun 2018 nodréiglech regulariséiert gëtt mat dann engem kloer fixéierte Montant dran. Der "Cellule scientifique" vun der Chamber no ass dat méiglech. Den Affekot, op deen d'CSV sech berifft, gesäit dat anescht.

Sollt de Staatsrot dee Wee net gutt heeschen, misst een der CSV no bei Null ufänken an e ganz neit Finanzéierungsgesetz fir dës wichteg Servicer, virop d'Entsuerge vun Offäll, maachen. Da misst och eng nei ëffentlech Ausschreiwung gemaach ginn, esou de Gilles Roth.

Der CSV stelle sech eng Hellewull u Froen iwwert dee Kontrakt vun 2018, mat deem Oeko-Service 97 Milliounen Euro vum Staat bezuelt kritt. Zum Beispill firwat d'lescht Joer beim Audit iwwer d'"SuperDrecksKëscht" just e puer Aspekter ënnersicht gi wären. Och iwwer d'Ausschreiwung am Joer 2017 wär villes net kloer, ginn d‘Deputéiert Adehm a Roth ze bedenken. Si géingen och gär wëssen, firwat de Staat sech net d'Rechter um Markennumm „SuperDrecksKëscht“ geséchert hunn. Si schwätze vun engem Konstrukt mat sëllege Sous-traitanten. Och wéinst der kollegialer Relatioun tëscht dem Firmechef Hans-Peter Walter an dem Direkter vun der Ëmweltverwaltung ass ee bei der CSV mësstrauesch.

Wann d'Ëmweltministesch Carole Dieschbourg d'nächst Woch an der gemeinsamer Sëtzung vun der Ëmweltkommissioun an der vun der Budgetskontroll an der Chamber keng Äntwerten liwwere géing, wëll d'CSV deen Debat am grousse Plenum féieren. A leschter Instanz géif d'Oppositiounspartei eng Enquêtëkommissioun froen.

Fuerderung vun engem koherenten a biergernoem Naturschutgesetz

Nieft dem Dossier ''SuperDrecksKëscht'' war d'Naturschutzgesetz Sujet op der Pressekonferenz vun der Chrëschtlech-Sozialer Vollekspartei. Iwwer dee Gesetzprojet gëtt d'nächst Woch an der Chamber ofgestëmmt. D'CSV fuerdert op en neits Nobesserungen a mécht am Ganze 17 Proposen.

E biergernot Gesetz fir den Naturschutz dierft virop d'Striewe géint d'Wunnengsnout ausbremsen. Prozeduren dierften net an d'Längt gezu ginn. D'Co-Fraktiounspresidentin Martine Hansen schwätzt sech kloer géint Kompenséierungsmesuren am Bauperimeter aus. All Proprietär vun Terrain misst am Naturschutz d'selwecht behandelt ginn.

Eng innovativ an diversifiéiert Landwirtschaft misst och an enger Gréngzon méiglech sinn, huet nach de Jeff Boonen, Member am CSV-Nationalcomité betount. Dat neit Naturschutzgesetz hätt onnéideg Hürden, bedauert den Agrar-Ingenieur, an déi misste virum Vott nach gestrach ginn.