Wéi de CGDIS matdeelt, goufen et um Dënschdeg 4 liicht Blesséierter bei enger Rei Accidenter uechtert Land.

Kuerz no 18.30 Auer sinn zu Esch am Rond-point Rammerech 4 Autoen accidentéiert. Zwou Persoune goufe liicht blesséiert. Am Asaz waren d'Rettungsdéngschter vun Esch souwéi d'Ambulanze vu Monnerech an Esch.

Um 20.30 Auer koum et op der A13 tëscht Munneref an Helleng zu engem Accident tëscht 2 Gefierer. Och hei gouf eng Persoun liicht blesséiert. De Rettungsdéngscht vu Réimech an d'Ambulanze vu Munneref an Uespelt waren op der Plaz.

E weidert Accident war géint 22 Auer zu Räichel an der Rue de Saeul geschitt. Ee liicht Blesséierte gouf vun de Rettungsdéngschter vu Réiden versuergt. D'Automobilistin ass eegenen Aussoen no engem wëllen Déier ausgewach an dobäi géint d'Leitplanke geroden.

Mëttwoch

Op der A4 bei Esch a Richtung A13 ass e Gefier widder d'Leitplank komm. Eng Persoun gouf dobäi blesséiert. Am Asaz waren d'Ambulanze vun Esch, Monnerech a Schëffleng souwéi de Rettungsdéngscht vun Esch.