Dat freet de President vun der Staatsbeamtegewerkschaft CGFP, de Romain Wolff, op senger Facebooksäit.

CGFP / Reportage Dany Rasqué

"Mir hunn an der Tripartite en donkelt Bild gemoolt kritt iwwert déi verschidde wirtschaftlech Beräicher, zu deenen och d'Banke gehéieren an elo stellt sech eraus, datt dat Bild bei de Banken net sou donkel schéngt ze sinn." Dat seet de President vun der Staatsbeamtegewerkschaft CGFP, de Romain Wolff am RTL Interview.

An de soziale Medien hat hien d'Fro opgeworf, wou d'Solidaritéit bleift. D'Banke géife soen, et géif hinne ganz schlecht goen a kuerz drop géifen et super Dividendë fir d'Aktionäre vun der BGL/BNP Paribas ginn a bei der BIL géif elo an dëse schwéieren Zäiten driwwer nogeduecht ginn, fir d'Luxair an hiert Personal falen ze loossen.

"Wann ee grad elo drun denkt, fir déi Parten eventuell ze verkafen, dann ass dat en denkbar schlechten Ament", esou de Romain Wolff. Et wier gewosst, datt d'Luxair et net einfach hat an huet - duerch d'Pandemie, mä och duerch de Krich.
Am Fall, wou elo géif dru geduecht ginn, datt de Staat déi Parte soll iwwerhuelen, misst een drun erënneren, datt och de Staat net alles maache kann.

Selbstverständlech, seet de President vun der CGFP, stéing d'Staatsbeamtegewerkschaft awer nach ëmmer hannert dem Accord aus der Tripartite, och wa se léiwer gehat hätt, wann den Index net ugepaakt gi wier.

Den Accord vun der Tripartite gesäit jo ënnert anerem d’Verréckele vun op d’mannst der Indextranche vun August op den Abrëll d’nächst Joer vir. Besonnesch niddreg Gehälter kréien als Kompensatioun Steierkreditter. Am Géigesaz zur CGFP an dem LCGB huet déi gréisst Gewerkschaft am Privatsecteur den Accord verworf a plangt fir den 1. Mee eng "kämpferesch" Manifestatioun.