Den Ëmweltministère confirméiert, datt um Haff Réimech bei Rëmerschen Deckelsmouke mat "Schildkrötefalen" gefaangen an dono dout gemaach goufen.

Schildkröten dout gemaach / Rep. Tim Morizet

Wéi d'Ëmweltministesch Joëlle Welfring dem Piraten-Deputéierte Marc Goergen op eng parlamentaresch Fro äntwert, sinn 72 Schildkröte vun engem Veterinär ageschléifert ginn. Dat well et eng Zort Deckelsmouk ass, déi op der Lëscht vun den invasiven exoteschen Aarte steet an hiert Doheem net an der Lëtzebuerger Natur huet, erkläert den Tiago de Sousa, Chargé d'Etude vun der Naturverwaltung.

Et ass eng Schildkröt, Trachemys scripta, déi zu den invasiven Aarte gehéiert. Et ass en EU-Reglement dat festsetzt, datt mer dës Aarte musse geréieren an dës Schildkröt gehéiert dozou.“

No Gespréicher tëschent dem Ministère fir Ëmwelt, Klima an nohalteg Entwécklung, der Naturverwaltung an der Veterinärsverwaltung gouf decidéiert, d'Deckelsmouken anzeschléiferen.

Invasiv Aarten zielen zu de 5 Haaptgrënn fir de Biodiversitéitsverloscht. Dës Schildkröte si besonnesch schwiereg.

Si sinn net nëmme vegetaresch, mee och karnivor. An engem Weier iesse si zum Beispill Waasserplanzen, mee och d‘Eeër déi zum Beispill Fësch drop leeën. Mee och kleng Wierbel a Wierbellos-Déieren si betraff. A vill vun deenen Aarte sinn aktuell bedreet.“

Ënner anerem de Kammmolch an deem seng Kauzekäpp. D‘Optioun, Déieren a Sanctuairen ënner ze kréien, ass schwiereg.

Wa mir déi kleng Capacitéite géife benotzen, da kéinten d‘Privatleit bemol hir Schildkröten do net méi ofginn. A mir hu léiwer d‘Leit maachen dat ewéi hir Déieren einfach an der Natur auszesetzen.“

Fir d'Deckelsmouken op enger anerer Plaz ze halen, wier net méiglech gewiescht, well et der vill sinn a well se iwwer 30 Joer kënne liewen, heescht et. Den Ëmweltministère geet iwweregens dovun aus, datt d'Schildkröte warscheinlech vu Privatleit um Haff Réimech ausgesat goufen a rifft d'Populatioun dozou op dat sinn ze loossen.