E Méindeg hieft d'Luxair d'Maskeflicht am Fliger op. Allerdéngs just fir déi Destinatiounen, déi et erlaben.

Wéi déi national Fluchgesellschaft matdeelt, muss ee vun deem Moment un also keng Mask méi undoen, op Flich fir op Lëtzebuerg a fir an déi Länner, an deenen d'Mask am Fliger net méi virgeschriwwen ass.

D'Passagéier si gebiede sech virum Depart iwwert déi jeeweileg Bestëmmungen op hiren Destinatiounen z'informéieren. De Generaldirekter vun der Luxair Gilles Feith bedauert am RTL-Interview, datt d'EU an dëser Fro keng gemeinsam Reegel bis elo fanne konnt.

D'Covid-Gesetz applizéiert sech an deem Sënn net op de Fliger, well d'Aviatioun net ënnert den ëffentlechen Transport fält. A Bus, Zuch an Tram bleift d'Mask fir den Ament jo nach virgeschriwwen, kéint awer och mam neie Covid-Gesetz opgehuewe ginn, wéi de Santésdirekter Jean-Claude Schmit ze lescht nach bei eis op der Antenn duerchblécke gelooss huet.

E Méindeg hate sech zwou europäesch Agencen, déi europäesch Loftsécherheetsagence EASA an déi europäesch Gesondheetsagence ECDC derfir ausgeschwat, déi sanitär Mesuren am Fluchverkéier ze lackeren.

D'Luxair huet och 2021 nees mat enger Perte ofgeschloss. Am zweete Pandemiejoer huet d'Fluchgesellschaft beim operationelle Resultat e Minus vun 33,7 Milliounen Euro gemaach. D'Netto Resultat läit bei engem Minus vun 2,3 Milliounen Euro. 

Domadder sinn Chiffere vun zejoert, awer däitlech besser wéi déi vun 2020. Do stoung als Nettoresultat e Verloscht vu knapp 155 Milliounen Euro an de Bicher.

D'Airline eleng huet och erëm méi Passagéier transportéiert. Nom Minus vun 71 Prozent 2020 gouf et d'lescht Joer e Plus vun 29 Prozent. Am Ganze si bal 517.000 Passagéier mat Luxair geflunn.

En nach méi däitleche Plus gouf et bei Luxair Tours. Do ass d'Zuel vun de Passagéier ëm 119 Prozent geklomm, op méi wéi 560.000.

D'Chifferen aus dem August zejoert ware bal op deem selwechten Niveau wéi 2019. Am September an am Dezember waren se souguer iwwert deene vun 2019.

Eng wichteg Roll hunn d'Forfaitsreese gespillt, wou et e Plus vun 150 Prozent gouf.

Fir Luxair Cargo gouf et eng Hausse vun 19 Prozent. Mat 1.125.000 Tonnen goufen eng éischte Kéier méi wéi eng Millioun Tonne Gidder transportéiert.

Gutt Resultater och fir Luxair Services, zu deenen  de Catering gehéiert. Do gouf et e Plus vun 48 Prozent.

D'lescht Joer si liicht méi wéi 2 Millioune Persounen um Findel passéiert. Dat ass eng Hausse vun 41 Prozent, déi iwwert der europäescher Moyenne läit.

Wat d'Perspektive betrëfft, schreift d'Luxair an hirem Joresrapport, datt ee sech vill vun dësem Joer versprécht. Virun allem bei LuxairTours wieren d'Reservatiounen eropgaangen.

Trotz allem ass 2022 nach ëmmer vu Covid markéiert an d'Gesellschaft präziséiert och, datt se ënnert deenen héije Pëtrols- an Energiepräisser an Europa leit.