Seng Urgroussmammen op béide Säiten hate portugisesch Originnen an hie géif den Attachement vun de Portugisen un de groussherzoglechen Haff och fillen.

Dat sot de Grand-Duc Henri en Donneschdeg zu Lissabon. Vue dass och seng Fra, d'Grande-Duchesse Maria Teresa, kubanesch Wuerzelen hätt, géif hie sech an där Latinitéit ganz wuel fillen, sou nach de Lëtzebuerger Staatschef. Um zweeten a leschten Dag vun der Staatsvisitt a Portugal stounge fir déi groussherzoglech Koppel weider Rendez-vousen a politeschen Institutiounen um Programm, an awer och en emotionale Besuch zu Cascais.

Mat op en Neits militäreschen Éiere gouf déi groussherzoglech Koppel en Donneschdeg de Moien am Parlament zu Lissabon empfaangen. Hei goufen d'Gäscht aus Lëtzebuerg vum portugisesche Parlamentspresident an enger Rei Deputéierte begréisst a si kruten en Abléck an d'Raimlechkeete vun deem impressionante Gebai. Manner grouss, dofir awer net manner wichteg, ass de Sëtz vum Premierminister Antonio Costa, deen op e gemeinsaamt Mëttegiessen invitéiert hat. 2010 war weder hien nach den aktuelle portugisesche President am Amt an déi deemoleg Staatsvisitt a Portugal huet sech a weidere Punkte vun där vun dësem Joer ënnerscheet.

"Virun 12 Joer war Portugal praktesch en anert Land", sou de Grand-Duc, "an ech muss soen, d'Evolutioun vun der Ekonomie ass enorm".

130 Entreprisen aus dem Grand-Duché waren am Kader vun dëser Staatsvisitt mat op Lissabon. Net awer op Cascais, wou de Grand-Duc Henri un d'Vergaangenheet erënnert gouf. An zwar un d'Grande-Duchesse Charlotte an hir Famill, déi am Joer 1940 opgrond vun der däitscher Invasioun zu Lëtzebuerg, d'Land verlooss haten an op hirer Flucht an Direktioun Amerika och e puer Wochen an der Casa de Santa Maria gewunnt hunn.

De Grand-Duc:

"Natierlech war et voller Emotiounen, nach emol zu Cascais ze sinn. Virun 11, 12 Joer hate mer do och e klenge Pèlerinage gemaach a mir haten an d'Haus, wou meng Groussmamm a mäi Papp do waren, am Fong e Büst als Kaddo ginn an dee Büst ass nach ëmmer do. An et war schéin ze gesinn, dass déi Erënnerung nach ëmmer an deem Haus bleift."

RTL

© SIP

D'Erënnerungen un déi groussherzoglech Famill an d'Relatiounen tëscht Lëtzebuerger a Portugisen, besonnesch a schwéieren Zäite goufen och an der Ausstellung "Portugal et Luxembourg, pays d'espoir en temps de détresse" festgehalen. Eng Expo, déi och scho bei eis am Land ze gesi war.

Nach emol de Grand-Duc:

"Déi ganz Problematik vun der Wanderung ass do dran, plus de Krich. An dat ass emotional ganz staark gewiescht, fir dat matzëerliewen, mat de Portugisen a mat der Communauté juive."

Fir déi groussherzoglech Koppel war dës Staatsvisitt déi zweet bannent 12 Joer a Portugal. Dat ass schonn aussergewéinlech, an awer gouf d'Fro gestallt, ob fir de Grand-Duc Henri vläicht souguer en drëtten offizielle Staatsbesuch zu Lissabon a Fro kéim.

Leschten Dag vun der Staatsvisitt a Portugal
Fir déi groussherzoglech Koppel war dës Staatsvisitt déi zweet bannent 12 Joer a Portugal.

Fotoe vun der Staatsvisitt