Kuerz virun 8 Auer koum et op der Héicht vun der Val de Hamm an der Polvermillen zu engem Accident, deen nawell fir Chaos am Trafic gesuergt hat.

D'Gefier vun enger Automobilistin ass aus ongekläerte Grënn op d'Géigespuer geroden a krut do e Schülerbus ze paken. Wéinst dem relativ heftege Schock ass de Won nees zeréck op d'Fuerbunn geschleidert ginn, wou et zu enger zweeter Kollisioun mat engem Bus koum, an deem deen Ament awer keng Passagéier waren.

Wéi d'Police präziséiert, goufen am Schülerbus 2 jonk Persoune méi liicht verwonnt a koumen an d'Kannerklinik. Och d'Automobilistin gouf blesséiert a koum an d'Spidol. Dat staark beschiedegt Gefier huet missen ofgeschleeft ginn.

Geschitt ass dat Ganzt op der N2 um Val de Hamm vum RP Irgäertchen a Richtung Polvermillen, am Beräich vun der Rue des Alouettes. D'Strooss huet misse fir e puer Stonne gespaart an den Trafic huet missen ëmgeleet ginn. Et huet deels bis op der N2, bis zéck an den RP Sandweiler an deels an den Ausfaarte vun der Tréierer A1 erof gestaut.