De Krich hätt d'Meenung an de skandinavesche Länner an deem Kontext geännert. Si gesinn am Verdeedegungspakt NATO elo eng Sécherheet.

De Jean Asselborn am Interview - Reportage Roy Grotz

Och géint eng russesch Invasioun wéi déi an der Ukrain, dat sot de Lëtzebuerger Ausseminister Jean Asselborn am RTL-Moiesjournal. De Putin hätt duerch de Krich de Bäitrëttswonsch vu Schweden a Finnland provozéiert. Well en Accord awer muss unanime geholl ginn, wier elo nach Iwwerzeegungsaarbecht beim NATO-Member Tierkei néideg.

Hei schwätzt de Lëtzebuerger Chefdiplomat vun der "Bazards-Mentaltéit" vum tierkesche President Erdogan. Et géif ëm Liwwerunge vun US-amerikanesche Kampffligere goen, wou d'Tierkei wéilt Drock maachen. Negociatioune wieren dann och nach néideg am Krees vun der EU, fir weider Sanktioune géint Russland ze decidéieren. Notamment en Importstopp vu russeschem Pëtrol. Besonnesch Ungarn blockéiert jo hei.

De kompletten Interview mam Jean Asselborn

Den tierkesche Veto géint den ugestrieften NATO-Bäitrëtt vu Finnland a Schweden bezeechent de Lëtzebuerger Ausseminister als eng Method vum President Erdogan, fir de Präis fir e "JO" an d'Luucht ze dreiwen. Dëst wier eng Basars-Mentalitéit - den Hannergrond wieren Accorde fir Waffeliwwerungen, déi sech Ankara vun den USA erwaarden. Et geet ëm F-35-Kampf-Fligeren.

Fligeren, déi d'Tierkei vun den USA solle geliwwert kréien, mee eng Commande, déi Washington op Äis geluecht huet. Hannergrond vun dësem Blockage ass e Streit ëm russesch Loftofwierrakéiten, déi Ankara 2019 kaf hat.

Egal wéi: Lëtzebuerg ënnerstëtzt d'Demande vu Finnland a Schweden fir an d'NATO ze kommen. Den Ukrain-Krich hätt d'Meenung an de skandinavesche Länner an deem Kontext geännert, sot de Lëtzebuerger Ausseminister Jean Asselborn am RTL-Moiesjournal. De President Erdogan géif agéieren, wéi op engem Basar, a wéilt just Drock maachen.