Am Verglach zu 2017 goufen am Joer 2021 2 Mol sou vill Päck ausgedroen.

Bilan 2021 vun der Post / Reportage Anne Wolff

De klassesche Bréifverkéier hëlt weider staark of, hei gouf et e Minus vun 30% an de leschte 5 Joer, esou d'Chiffere vum Post-Bilan 2021.  En Trend, deen duerch d'Pandemie dogéint richteg lancéiert gouf, ass d'Geschäft mat de Colisen. D'lescht Joer goufen esou méi wéi duebel esou vill Päck ausgeliwwert wéi nach 2017.

Et ware knapps 7 Millioune Päckelcher am Joer 2021. Trotzdeem wier dat awer net esou rentabel wéi de klassesche Bréif, erkläert de Generaldirekter Claude Strasser.

Uechter d'Land wieren am Moment ëm déi 1500 Chantieren, well een amgaange wier, déi ganz Kommunikatioun bis 2025 ob sougenannten All-IP ëmzestellen. Dat bedeit, dass de ganzen Datenaustausch, och telefonéieren, iwwer Internet geet. Bis 2035 wëllt een donieft komplett op Glasfaser ëmklammen.

Suerge mécht der Post weiderhin de Finanzberäich. Hei hätt een déi lescht Joren ze vill Negativzënse bezuelt. D'Zuel vun de Leit, déi an e Postbüro ginn, fir Iwwerweisungen ze maachen, géif dogéint ëmmer weider ofhuelen. Domat erkläert de Generaldirekter d'Fermeture vu verschiddene regionale Postbüroen.

Obwuel de Kontext mat e puer Krise gläichzäiteg och fir d'Geschäfter vun der Post net ideal ass, stéing de Grupp finanziell gutt do, betount de President vum Verwaltungsrot Serge Allegrezza. 2021 huet d'Post e Chiffre d'affaires vu ronn 899 Milliounen Euro realiséiert. Dat ass eng Hausse vu 4 Prozent par Rapport zum Joer virdrun an déi erkläert sech an der Haaptsaach mat der Integratioun vu LuxTrust. D'Post ass elo do majoritären Aktionär.

D'Bruttoresultat läit bei 159 Milliounen, dat sinn der 5,6 méi ewéi 2020.

Ma no 4 Joer Hausse schléisst de Post-Grupp d'Joer 2021 mat engem Benefice an der Baisse of. 28,7 Milliounen: dat sinn der 7,5 manner ewéi dat Joer virdrun. Dat erkläert sech an der Haaptsaach mat enger Baisse vun 13,6 Millioune beim Finanzresultat. Et si manner Finanzproduite verkaaft ginn an déi direkt Steiere ware méi héich.

Et wär en zolitte Bilan, deen den Erwaardungen entsprécht, betount de Generaldirekter Claude Strasser.