Nom Méindeg gouf et elo nees en Accident, an deem e Bus verwéckelt war.

Zu Furen an der Dikrecher Strooss ware géint 8.30 Auer en Auto an e Bus net laanschtenee komm - eng Persoun gouf verwonnt.

Géint 13.20 Auer huet an der Rue de Rollingergrund an der Stad tëscht zwee Autoe geknuppt. Hei war keng Persoun blesséiert ginn. Op der Plaz am Asaz waren d'Rettungsdéngschter aus der Stad.

Zu Péiteng bei der Porte de Lamadelaine war kuerz viru 15 Auer en Automobilist mat sengem Gefier widder e Potto gerannt. Och hei gouf et kee Blesséierten. D'Ambulanz vun Diddeleng an d'Pompjeeë vu Péiteng waren am Asaz.

Op der A4 tëscht Leideleng a Steebrécken koum et zu enger Kollisioun tëscht engem Auto an engem Moto. Eng Persoun gouf dobäi blesséiert a vun der Ambulanz aus der Stad versuergt. Donieft waren d'Pompjeeën aus der Stad, vu Leideleng a Monnerech op der Plaz.

Zu enger weiderer Kollisioun koum et géint 16.40 Auer op der N10 tëscht Weilerbaach an der Bollenduerfer Bréck. Dat tëscht engem Camion an engem Auto. Och hei gouf eng Persoun blesséiert. Am Asaz war d'Ambulanz vun Iechternach an d'Pompjeeë vu Bäerdref.

Da ware Pompjeeën direkt 3 Mol am Asaz: Um 10 Auer hat tëscht Sëll an Schweebech eng landwirtschaftlech Maschinn gebrannt an um 10.30 Auer huet missten e Blumme-Back zu Steebrécken geläscht ginn. Géint 15 Auer hat et an engem Bësch tëscht Esch-Sauer a Lëlz gebrannt.