No 2 Joer Pandemie géif et erëm eng "normal" Schueberfouer ginn, déi am August organiséiert gëtt.

D’Schueberfouer wäert dëst Joer erëm an der gewinnter Form sinn. Dat huet d’Stater Buergermeeschtesch Lydie Polfer e Mëttwoch de Moien um traditionelle CityBreakfast betount, wou et allgemeng ëm de Summer an der Stad goung, an alles, wat de Leit soll ugebuede ginn.

CityBreakast/Reportage Claudia Kollwelter

No 2 Joer Pandemie géif et erëm eng "normal" Schueberfouer ginn, déi am August organiséiert gëtt. Donieft war et dann nach d’Annonce, datt d’Pirateschëff am Park Enn Juni erëm soll opgoen an datt d’Kasematte bei der Gëlle Fra offiziell de 5. Juni hir Diere fir de Public opmaachen.

D’Leit sollen de Summer iwwer souvill wéi méiglech an der Stad gebuede kréien. Dat huet d’Stater Buergermeeschtesch Lydie Polfer um CityBreakfast betount. Och Nationalfeierdag wäert erëm a gewinnter Form sinn, donieft sollen awer och aner Plazen an der Stad en Valeur gesat ginn.

Dat ass engersäits d'Place de France zu Märel, wou aktuell Chantier ass a wou awer wärend dem Congé collectif am Summer, also wärend dem Mount August, eng gemittlech Plaz entstoe soll mat engem Kiosk. An dee gëtt elo ausgeschriwwen a soll wéi e Pop-Up funktionéieren. Änlech also wéi dee vun der Charly's Gare, dee schonn ausgeschriwwe gouf a wou 19 Dossieren erakoumen an elo een ausgewielt gëtt.

Am Park vun der Villa Vauban da wäert am Summer och méi ugebuede ginn, mat enger Buvette, esou d'Stater Buergermeeschtesch Lydie Polfer. "Dat nenne mer dann "John's Cottage". Mir hunn den 1. Juli och d'Ouverture vum englesche Moler John Constable an dat passt dann och gutt."

Ufank Juni maachen dann och d'Péitruss-Kasematten hir Diere fir de Grand-Public op an d'Pirateschëff am Park soll Enn Juni endlech fäerdeg sinn. Eigentlech sollt d'Spillplaz nämlech Ouschteren erëm opgoen. Den CSV.Schäffe Serge Wilmes: "Et ass haaptsächlech, datt d'Envergure vun deem Ronderëm net sou ageschat gouf. Wann een oprappe geet, gesäit een, datt awer méi ënnendrënner futti war. An dat gëtt eben elo frësch gemaach, fir net dann a puer Méint erëm unzefänken."

Souwuel Nationalfeierdag wéi och d'Schueberfouer wäerten dann erëm a gewinnter Form sinn, ouni Corona-Restriktiounen an esou weider. Mee och wann et erëm eng ganz normal Schueberfouer wäert sinn, hätt een awer och aus de positiven Erfarunge vun der Pandemie geléiert, huet d'Lydie Polfer ënnerstrach an dofir wier zum Beispill d'Kiermes wéi fréier op der Kinnekswiss bäibehale ginn, déi dëse Freideg opgeet.