Et bleiwen nach eng Partie Froen, mä d'Zil bleift, datt d'Gesetz, dat den Accord aus der Tripartite ëmsetzt, deen anere Mount duerch d'Chamber geet.

Am Juni soll jo, de leschte Berechnunge vum Statec no, och schonn déi nächst Indextranche erfalen, déi notamment duerch Steierkreditter kompenséiert soll ginn. Den Direkter vum Statec Serge Allegrezza stoung e Freideg den Deputéierte vun der Tripartite-Spezialkommissioun Ried an Äntwert an der Chamber. An der Lescht gouf et jo Diskussiounen, well kuerz nom Ofschloss vun der Tripartite, de Statec seng Previsioune vun der Präisdeierecht no uewe revidéiert huet. Trotz enger méi héijer Inflatioun, géifen d'Mesuren, déi an der Tripartite ausgehandelt goufen, fir dëst Joer awer duergoen, fir de Kafkraaftverloscht opzefänken. Dat hätt ee sou gerechent, huet de Serge Allegrezza e Freideg de Moien am RTL-Interview betount. Mat der Nuance, et kéint kee wëssen, wat am Wanter geschitt.

Et bleift dann derbäi, datt d'Sozialpartner net méi an d'Spezialkommissioun geruff ginn. Dem President Gilles Baum vun der DP no géif an der Chamber net méi nei verhandelt, mä just den Accord gesetzlech ëmgesat ginn, deen d'Regierung mat de Sozialpartner fonnt hat. D'Beruffskummeren dogéint sollen nach gehéiert ginn an d'Deputéiert waarden och nach op den Avis vum Staatsrot.

Tripartite- Spezialkommissioun / Rep. Claude Zeimetz

Avis vun der CSL

D'Chambre des salariés verwerft an hirem Avis de Gesetzprojet, deen den Accord vun der Tripartite vun Enn Mäerz ëmsetze soll. An hiren Ae géingen trotz de Steierkreditter, déi virgesi sinn, fir d'Verréckele vun enger Indextranche ze kompenséieren, eng Rei Salariéen a Pensionären u Kafkraaft verléieren.

De Vott an der CSL zum Avis spigelt erëm, wéi d'Gewerkschaftsfront opgespléckt ass: 41 gewielte Membere vun der CSL hu sech géint d'Mesurë vun der Tripartite ausgeschwat, 19 waren awer dofir. Am Avis steet, datt d'minoritär Positioun vum LCGB de Gesetzprojet iwwert d'Tripartite-Mesurë guttheescht.

E puer LSAP-Memberen net d'Accord

An de Reie vun der LSAP drécken elo och eenzel Memberen hiren Desaccord mat de gestëmmten Tripartite-Mesuren aus. Déi laangjäreg LSAP-Membere Nando Pasqualoni an Nico Wennmacher deelen d'Meenung vun der LSAP-Spëtzt net, datt den Index gerett wier. Si fuerderen hir Parteikolleegen, déi an der Chamber sëtzen, op, géint d'Gesetz zur Ëmsetzung vun den Tripartite-Mesuren ze stëmmen.