D'Aschätze vun enger Donkelziffer ass ëmmer schwiereg, dat äntwert de Policeminister Henri Kox dem Piraten-Deputéierte Sven Clement.

De Sven Clement wollt no enger éischter parlamentarescher Fro iwwert de Respekt vum Mindestofstand beim Iwwerhuele vu Cyclisten nach emol nohaken.

Den Henri Kox hat a senger éischte Äntwert festgestallt, datt an de leschte 6 Méint keen Automobilist protokolléiert ginn ass, well en e Cyclist ze no iwwerholl hätt. D'Associatioun ProVelo hat sech duerno zu Wuert gemellt a kritiséiert, d'Police géif déi virgeschriwwen 1,5 Meter Distanz guer net anstänneg kontrolléieren. Zanter datt d'Gesetz am Abrëll virun dräi Joer a Kraaft getrueden ass, si grad emol 33 Verstéiss an de Police-Statistiken notéiert ginn.

Dem Policeminister no géif et kee Sënn maachen, spezifesch Kontrolle vun dëser Infraktioun ze maachen a gëtt zou, datt d'Policebeamte Verstéiss géint de virgeschriwwenen Ofstand just mam bloussen A feststellen. Technesch Apparater heifir hätt een net. D'Aféiere vun der 1,5-Meter-Ofstandsreegel wier éischter präventiv geduecht gewiescht, fir d'Acteure vum motoriséierte Verkéier ze responsabiliséieren.