D'Tëlee stoung e Mëttwoch ganz am Zeeche vum Virowend vun Nationalfeierdag: Mir waren zu Esch, an der Stad an der Gemeng Kiischpelt mat dobäi.

Nodeems mer eng leschte Kéier 2019 de Virowend vun Nationalfeierdag esou richteg gefeiert hunn, dierfte vill Leit de Mëttwoch den Owend ënnerwee sinn, fir an den Donneschdeg eranzefeieren. Dat ganzt Land feiert um Virowend. Mir feiere mat a waren dowéinst zu Esch an an der Stad ënnerwee, fir Iech ze weisen, wat op deene verschiddene Plazen lass war.

Esch krut Besuch vun der Ierfgroussherzoglecher Koppel

Dat vun der Ierfgroussherzoglecher Koppel. Den Ierfgroussherzog Guillaume a seng Fra, d‘Ierfgroussherzogin Stéphanie si kuerz viru 17 Auer op der Brillplaz agetraff, ier se mat de sëllegen Escher Veräiner a Richtung Gemengeplaz gaange sinn. Traditionell ass et jo sou, dass déi Ierfgroussherzoglech Koppel um Virowend vun Nationalfeierdag ëmmer op Esch kënnt, wärend de Grand-Duc Henri a seng Fra ëmmer eng aner Gemeng aus dem Land besichen.

Um Oflaf vum Virowend vun Nationalfeierdag huet sech zu Esch no 2 Joer Pandemie awer näischt Grousses geännert. Et ass traditionell lassgaange mam Empfang vum Buergermeeschter an der Schäffe vun der Esch Stad, zesumme mam Minister op der Brillplaz. Do wou och de Musée de la Résistance ass. Vun do aus si si déi längste Foussgängerstrooss aus dem Land erof op d‘Gemengeplaz getrëppelt. Suivéiert vun engem Cortège, deen aus alle méiglechen Escher Associatioune besteet.

D‘Harmonie municipale an d‘Chorale hunn den Ufank gemaach, ier d‘Scouten an d‘Guidë komm sinn an d‘Police mat hiren Hënn, sou wéi déi verschiddenste Sport- a Kulturveräiner. Fir d‘Ierfgroussherzoglech Koppel ass et nom Passage vun de Veräiner virun der Tribün weider erop an de Festsall vun der Escher Gemeng gaangen, wou si Representante vu Gemeng, Betriber a soss Escher Perséinlechkeete konnte begréissen, ier se dunn op de Balcon gaange sinn, fir de Leit op der Plaz ze wénken.

De Virowend an der Stad

Och an der Stad weess een, wéi een e Virowend vun Nationalfeierdag feiert. Mir hunn am Virfeld de Bols bei de Leit gefillt, déi beim Fakelzuch derbäi sinn a sech op dat traditionellt Freedefeier freeën.

Live an der Stad
Wéi ass d'Stëmmung um Virowend vun Nationalfeierdag?

Endlech erëm ënnert d'Leit. Endlech ass et quasi nees ewéi virun der Pandemie. Et konnt een den Androck gewannen, wéi wann de Mënschen e Stee vum Häerz gefall wär. Eng schwéier Laascht vun de Schëlleren.

Beim Roude Pëtz hunn déi eenzel Clibb a Participante sech op de Cortège vum Fakelzuch preparéiert. Hei gouf sech opgestallt, lescht Detailer gekläert an d'Fakelen ugefaangen.

Laanscht d'Stroosse stounge vill, ganz vill Leit. Dee Spaass wollt kee sech entgoe loossen.

Virun allem war et flott fir bei der offizieller Tribün ze passéieren. Der groussherzoglecher Famill, de politesche Vertrieder an den Éieregäscht schéngt et gutt gefall ze hunn.

D'Freedefeier gouf vun der Neier Bréck aus an d'Luucht geschoss. Ronderëm d'Gelle Fra war kee Metercarré Plaz méi fräi. D'Leit waren aus dem Haischen. Ronn eng Véierel Stonn huet dee Spaass gedauert. Gefeiert gouf awer bis spéit an d'Nuet eran.

Virowend vun Nationalfeierdeg an der Stad
An der Uewerstad war immens villl lass an d'Leit waren um Rendez-vous

Déi Groussherzoglech Koppel zu Lellgen an der Gemeng Kiischpelt

Traditionell besicht déi Groussherzoglech Koppel um Virowend vun Nationalfeierdag, en Duerf, eng Gemeng. Haut goung et an den Norden op Lellgen an d’Gemeng Kiischpelt.

Groussherzoglech Koppel zu Lellgen / Rep. Sabrina Backes

D’Gemeng Kiischpelt ass net just aussergewéinlech, well se no kengem vun hire 7 Dierfer benannt ass. Mee och well op der Lou bei Äischer deen eenzege Schnëttpunkt am Grand-Duché läit, wou e Länge- an e Breedegrad sech kräizen. Markéiert gëtt dat vun der Kiischpelter Sonnekreess.

All d’Blécker waren awer haut op Lellgen geriicht, wou de Grand-Duc Henri an d’Grand-Duchesse Maria-Teresa kuerz viru 5 vum Chamberpresident an 1te Bierger a vum Kiischpelter Buergermeeschter a senge Schäffen empfaange gouf.

D’Pëntscher Chorale huet gesongen, d’Kanner hunn de Schoulkauz - d’Grondschoul vu Wëlwerwolz - virgestallt an duerno huet de Grand-Duc Medailen u laangjäreg Memberen aus der Kiischpelter Fanfare an dem Centre d’Incendie et de Sauvetage iwwerreecht.

Du war et d’Visitt vun der 30. Editioun vum Konscht Festival Kiischpelt. Den Open Air Festival ass jo traditionell op Nationalfeierdag, a wäit iwwer d’Grenzen eraus bekannt.

Wärend der Visitt krut d’Groussherzoglech Koppel Explikatiounen iwwer den Erhalt vun der aler Duerf-Architektur. Als typescht Ardennerduerf mat senge wäisse Fassaden a Schifer-Diech ass Lellgen eent vu 5 sougenannte Pilot-Dierfer vum Projet “Eist Duerf soll liewen”.

Bei der Hencksescheier haten d’Bierger, Artisten a Kanner d’Geleeënheet, perséinlech mam Grand-Duc a mat der Grand-Duchesse ze schwätzen. Ier d’Groussherzoglech Koppel sech kuerz du viru 19h op de Wee gemaach huet a Richtung Stad.