D'Caritas huet en Donneschdeg hir Fuerderunge präsentéiert, déi an de Koalitiounsaccord vun der nächster Regierung solle kommen.

Vill Parteie wieren elo dobäi, hire Walprogramm fir d'Chamberwalen d'nächst Joer opzestellen. Dofir géing ee pragmatesch a cibléiert Sozial-Mesurë presentéieren, déi relativ séier ëmzesetze wieren, heescht et vu Säite vun der Caritas.

D'Caritas gesäit sech als Porte-parole vun deene Leit, déi um ënneschte Bord vun der Gesellschaft stinn an keng Stëmm hunn, seet d'Presidentin Marie-Josée Jacobs. Als Deel vun der Zivilgesellschaft wëll ee Sozialthemen an den ëffentlechen Debat bréngen. Heivir géingen dacks awer Etüde feelen, déi weisen, wou et laangfristeg soll higoen: "Wat muss wierklech geschéien, datt mer op de Fong dovu kommen? Well nëmmen, wann een déi zouverlässeg Donnéeën huet, kann een och d'Aarmut an d'Illegalitéite reduzéieren."

Revendicatioune vun der Caritas / Rep. Diana Hoffmann

Et schéngt, wéi wann déi aller Vulnerabelst vun der Gesellschaft ëmmer géinge vergiess ginn, seet d'Carole Reckinger vun der Caritas. Dat kéint Suitten hunn. "Et gëtt elo dacks gesot, duerch all déi Krisen ass elo net den Zäitpunkt fir ze handelen. Mir denken awer, datt grad elo den Zäitpunkt ass fir ze handelen, well wann eis Gesellschaft ëmmer méi grouss Inegalitéiten huet, da si mer ëmmer manner widderstandsfäeg. A wa mer lo nach weider Krise kréien, da gëtt et och ëmmer méi schwéier, eis Gesellschaft zesummen ze halen."

Dofir misst cibléiert gehollef an de Prinzip vun der Géisskan reduzéiert ginn. D'Carole Reckinger betount, wat d'Politik maachen soll: "Generell, fir d'Aarmut an d'Prekaritéit ze reduzéieren, muss de Familljebudget rëm opgewäert ginn hei zu Lëtzebuerg. Wa mir méi sozial Gerechtegkeet wëllen, brauche mer och eng Steierreform. Do komme mer net dolaanscht, fir eng real sozial Ëmverdeelung kënnen ze kréien."

De Steierbarem soll doriwwer eraus reegelméisseg un d'Präisdeierecht ugepasst ginn, an och d'Steierklass soll an éischter Linn dovunner ofhänken, ob Kanner am Stot sinn. Weider Punkte sinn Upassunge bei den Allocatiounen a beim Revis. Ma och d'Fuerderung, datt Leit, déi schaffen, dovunner solle kënne liewen, an datt de Leit, déi op der Strooss liewen, besser gehollef gëtt.

De Marc Crochet, Direkter vun der Caritas, seet, datt awer net misst gewaart ginn, fir Saachen ze verbesseren. "An deem Pabeier sti Saachen dran, déi der Regierung vun haut gefale kéinten. A se kéinte se inspiréieren, fir nach ze handelen."

Trotzdeem wier et wichteg, och laangfristeg Ziler ze definéieren. Dofir stéing d'Caritas fir Diskussioune mat allen Acteure prett.