D'Politik misst endlech reagéieren a sech den Zukunftsfroe stellen, ier sech Katastrophe weider verschäerfen.

MouvEco-Appell un d'Politik/Claudia Kollwelter

Dat sot d'Presidentin vum Mouvement Ecologique Blanche Weber e Freideg de Moien op enger Pressekonferenz, op där am Kontext vun de Walen nächst Joer eng ganz Partie Appeller un d'Lëtzebuerger Politiker geriicht goufen. Et wier an den Ae vum MouvEco evident, datt et net sou weider kéint goen, wéi bis ewell. De Mouvement Ecologique fuerdert e Paradigmewiessel bei der Regierung, an dass si sech de reellen Zukunftsfroe stellt. Notamment misst den Drock aus dem Wuesstem erausgeholl ginn.

Zënter Joerzéngte wier gewosst, dass de Grand-Duché am Energiesecteur ze vill ofhängeg vun anere Länner wier. Mir géifen d'Konsequenze vum Klimawandel spieren an de Biodiversitéitsverloscht zu Lëtzebuerg wier dramatesch.

D'Vertrieder vum Mouvement Ecologique bedaueren, dass d'Regierung trotzdeem weider op grousse Wuesstem hei am Land setzt. E Wuesstem, deen an eng Sakgaass géif féieren, well en och d'Problemer an der Mobilitéit an dem Logement géif verschäerfen. Doriwwer eraus géif e grousse Populatiounszouwuess op Dauer zu Problemer am Sozial- a Pensiounssystem féieren. Dat géife rezent Analyse weisen, déi op engem Joreswuesstem vun 1,8% bis 2070 baséieren.

D'Blanche Weber, Presidentin vum Mouvement Ecologique, erkläert, datt virausgesat géif, datt d'Zuel vun de schaffende Leit hei am Land vun aktuell ëm déi 200.000 bannent knapp 50 Joer op 600.000 soll klammen, fir datt mer d'Pensiounen nach finanzéiert kréichen.

D'Stauen op eise Stroossen, d'Logementsproblematik oder d'Spidolsversuergung géife kloer weisen, datt eise System am Gaang ass ze explodéieren, an nawell géif d'Politik weider versichen, op de Wuesstem ze setzen. De Modell géif nach ëmmer um Wuesstem baséieren, et géif zwar versicht ginn, de Wuesstem ze steieren, mee et misst een dem Mouvement Ecologique no zouginn, datt en an deem Ausmooss net ze steiere wier.

Méi Wuesstem géif och net méi glécklech maachen. Am Géigendeel géifen Etüden iwwert de "Luxembourg Index of Well-being" weisen, dass d'Wuelbefannen an d'Liewensqualitéit vun de Leit am Grand-Duché géifen ofhuelen. D'Politiker dierften net weider just Symptomer behandelen, mee missten déi zentral Froe fir d’Wuelbefanne vun de Leit stellen.

Et géifen zwar eng Rei gutt Usätz an der Mobilitéits- a Landesplanungspolitik fir d'Zukunft, mee et misst ee sech agestoen, dass déi Iddien net kuerzfristeg ëmzesetze wieren. De Mouvement Ecologique wënscht sech dofir, dass d'Regierung de Wuesstëmsdogma hannerfreet a besser plangt. Dat wier och déi Diskussioun, déi am Superwaljoer 2023 misst am Fokus stoen, mengt de Mouveco.