Zënter Méint gëtt iwwer d'Impfflicht diskutéiert an op e weideren Avis vum Expertegrupp gewaart.

Déi aner Woch loossen déi Experten lo d'Kaz aus dem Sak. En Dënschdeg de Moien ëm 9 Auer ginn d'Recommandatioune presentéiert.

Op der Pressekonferenz present sinn den Dr Vic Arendt, de Professer Dokter Claude Muller, den Dr Gérard Schockmel, d'Dr Thérèse Staub an den Dr Paul Wilmes.

E Freideg 8 Deeg steet den Avis complémentaire um Ordre du Jour vum Regierungsrot.

Deen Dag gëtt et eng Regierungsdeklaratioun an en Debat an der Chamber.

An hirem leschte Covid-Update schwätzt d'Taskforce vun enger liichter Stabiliséierung bei den Infektiounen, déi zanter dem leschte Mount jo däitlech unzéien. Bedéngt duerch déi méi ustiechend BA5-Omikronvariant. D'7-Dages-Inzidenz ass d'lescht Woch liicht zréckgaangen. Et stieche sech ëmmer nach méi Leit un, mä d'Fäll schéngen net méi exponentiell an d'Luucht ze goen. D'Hospitalisatioune bleiwe stabel. Et hunn d'lescht Woch awer liicht méi Leit missen intensiv betreit ginn. Ënnert dem Stréch bleift den Drock op d'Spideeler awer moderat. D'Covid-Taskforce erënnert wéi ëmmer drun, datt social distancing a sanitär Mesurë besonnesch fir eeler a vulnerabel Persoune wichteg bleiwen, fir schwéier Verleef ze verhënneren, grad wéi d'Impfung an déi néideg Boosteren.