Den 112 mellt en Accident op der N12 tëscht Dondel a Buer, bei deem fënnef Persoune verwonnt goufen.

Wéi et vun der Police heescht war hat den Automobilist géint 5 Auer op der Streck d'Kontroll iwwert Gefier verluer a wier an e Bam gerannt. Eng Persoun wier liewensgeféierlech blesséiert ginn.

Éischten Erkenntnisser no ware 6 Persounen am Auto an haten dem Alkohol gutt zougesprach. Déi am Ganze fënnef Blesséierter goufe vum Samu an Ambulanze vu Mamer, Lëntgen, Stengefort an der Stad versuergt. Och d'Pompjeeë vu Kielen waren am Asaz.

De Miess- an Erkennungsdéngscht vun der Police waren op der Plaz. D'Gefier gouf op Uerder vum Parquet saiséiert.

D'Streck war fir e puer Stonne vun de Ponts et chaussées gespaart ginn.

Accident zu Rodange

Eng hallef Stonn méi fréi hunn och de Samu vun Esch an d'Rettungsdéngschter vu Péiteng a Suessem/Déifferdeng missen op en Asaz fueren. An der Avenue de l'Europe zu Rodange ass géint 4.30 Auer een Auto ëmgekippt. Zwou Persoune goufe blesséiert.