Déi Gréng Stad hunn d'Campagne fir d'Gemengewalen um Méindeg op der Plëss lancéiert.

Déi Gréng: "Frësche Wand fir ons Stad" / Reportage Pit Everling

D'Super-Waljoer 2023 réckelt méi no. Déi Gréng Stad wëllen um Knuedler un d'Rudder an zwar net just als Junior-Partner. De François Benoy gesäit sech um Buergermeeschter-Posten

Um Méindeg gouf d'Walcampagne lancéiert.  Scho ronn e Joer virun de Wale ginn déi Stater Gréng an d'Offensiv. Matten op der Plëss hu si sech de Leit presentéiert. Op de Plakater gëtt frësche Wand fir d'Stad versprach.

No enger Legislaturperiod Paus wëllen déi Gréng rëm um Knuedler an d'Responsabilitéit, dat mat engem aktuellen Deputéierten a Gemenge-Conseiller

"Ons Stad brauch frësche Wand an dofir kandidéieren ech, fir Stater Buergermeeschter ze ginn", esou de François Benoy

"Mir mengen, datt d'Stad an d'Bierger prett sinn, fir méi wäit ze goen. Iwwerall op der Welt gëtt et gréng Buergermeeschteren".

D'Potential vun der Stad géing just hallefhäerzeg genotzt ginn, esou "Déi Gréng".

Déi aktuell blo-schwaarz Majoritéit kritt Stëllstand reprochéiert, zum Beispill am Beräich Mobilitéit, wéi d'Conseillère Claudie Reyland betount. Si geet am Duo mam François Benoy als Spëtzekandidatin an d'Course.

"De Verantwortleche feelt et kloer u politeschem Courage, de Vëlo als nohaltegt zukünftegt Verkéiersmëttel konsequent ze stäerken. "

Den Duerchgangsverkéier soll aus de Quartieren eraus. D'Stad soll séier klimaneutral ginn an et sollen aner Wunnforme kommen.
Och dat si Fuerderunge vun deene Stater Gréngen.

Wie kéim da fir déi Gréng als Koalitiounspartner an der Märei a Fro? Op déi Fro gouf et keng kloer Äntwert. Et wier een oppen a géing mat jidderengem diskutéieren. Déi Gréng missten elo op d'Iddie vun deenen anere waarden.

De François Benoy mécht mat dëser Spëtzekandidatur wuel d'Dier zou, fir nach an dëser Legislatur-Period an d'Regierung ze wiesselen, do gëtt et jo allerhand Rumeuren.

"Ech hu mech haut engagéiert, fir eng Campagne ze maache fir déi Stater Gréng. Fir Spëtzekandidat a Buergermeeschterkandidat ze ginn, dat ass mäin absolutte Wonsch a Wëllen, fir mech fir meng Stad ze engagéieren." Déi komplett Lëscht mat de grénge Stater Kandidate fir d'Gemengewale soll an engem hallwe Joer presentéiert ginn.