D'Ekipp vun RTL sicht no Leit, déi interesséiert wieren, beim Opbau vun der wuessender Offer vu Videoclippen um Site ze hëllefen.

Är Erfarung ass heibäi net esou wichteg, wéi Är Motivatioun, eppes Neies ze léieren.
Am Detail sicht RTL no Leit, déi bei Tournagë fir de Site kënnen hëllefen. Gesicht ginn zwee Profiller: Engersäits Kandidatinnen a Kandidaten, déi op engem méi héijen Niveau mat Kameraen ëmgoe kënnen, fir u Serien ewéi "RTL Today Eats the World" oder anere gréissere Projete matzeschaffen. Heifir misst Dir professionell Kamerae bedéngen an am Idealfall och Videoe mat Adobe Premiere Pro beaarbechte kënnen.

Den zweete Profil, dee gesicht gëtt, si Leit, déi prett wieren, mat hirem Handy kuerz Clippen ze filmen, zum Beispill am Kader vun Eventer oder Concerten oder och "Behind the scenes". Net nëmme kéint Dir an dëser Roll also fir näischt u flotten Eventer deelhuelen, mä Dir géift och nach dofir bezuelt ginn.

Fir matzemaachen, hutt Dir zwou Optiounen:

Optioun 1 – ee kuerze Clip fir déi sozial Medien – dat ass alles, wat Dir fir den Deel Eventer/Handy maache musst.

  • Schéckt eis ee kuerze vertikale Clip vun engem Event
  • maximal 60 Sekonnen
  • Dir kënnt ee Frënd oder eng Frëndin ëm Hëllef froen, wann Dir de Clip am Voxpop-Stil maache wëllt!

Optioun 2 – Filmt eng Aktivitéit – dat maacht Dir am Idealfall, wann Dir un eise gréissere Projete matschaffe wëllt, mä d'Optioun 1 kann och schonn duergoen, falls Dir eis e puer eeler Projete vun Iech matschécken, déi mir eis ukucke kënnen.

  • Film eng Aktivitéit – Dir kënnt selwer eraussichen, wéi eng Zort Aktivitéit
  • maximal Längt: 4 Minutten
  • Querformat (landscape)
  • Dir kënnt e Frënd oder eng Frëndin ëm Hëllef froen, wann Dir se bei der Aktivitéit filme wëllt

Wann Dir mam filme fäerdeg a mam Resultat zefridde sidd, fëllt de Formulaire um Enn vun dësem Artikel aus a luet Äre Clip / Är Clips erop. Wann Dir zousätzlech Pluspunkte sammele wëllt, da schéckt eis ee Link zu engem Portfolio oder anere Videoen, déi Dir gemaach hutt (och wann dat net op "professioneller" oder bezuelter Basis war).

Am Géigenzuch kënnt Dir ee vun dräi Präisser gewannen

  • D'Geleeënheet, fir mat RTL ze schaffen
  • Ee personaliséierte Stage
  • Eng Apple Watch Series 5

Fir d'Apple Watch kënnen ze gewannen, musst Dir eis Ären Dossier bis de 17. August eraschécken. Fir d'Freelance Aarbecht a méiglecherweis och fir de Stage kënne mir awer och nach Dossieren akzeptéieren, déi no dësem Datum agereecht ginn!