D'Leit fléien nees méi an d'Vakanz. Et wier ee just nach 10 Prozent vum Niveau vun 2019 ewech, sou de Luxair-Generaldirekter Gilles Feith am RTL-Interview.

Luxair / Reportage Jean-Marc Sturm

2022 goufen et bis ewell 1 Millioun Passagéier, wann een d'Fluchgesellschaft a Luxair-Tours zesumme kuckt. D'Fligere wiere voll. Domadder ass een no un där Zuel vu virun der sanitärer Kris. Zanter Abrëll wären d'Leit nees bereet, méi mam Fliger an d'Vakanz ze fléien. D'Präisdeierecht hätt een net komplett un d'Clientë weider ginn, och well vill Leit laang am Viraus gebucht haten.

D'Destinatioune wieren ënnerschiddlech vun der Präisdeierecht impaktéiert an op ville Plaze wieren d'Hoteller däitlech méi deier ginn. Dofir hätten d'Clientë sech zum Deel vun de klasseschen Destinatiounen ewech gedréit.

D'Leit hätten am Géigenzuch zum Beispill d'Tierkei an Ägypten nei entdeckt an och de Cap Vert géing elo de Summer iwwer gutt lafen. Griicheland a Spuenien bleiwen awer weiderhin "à la une" bei de Vacancieren.

Vakanzen iwwer LuxairTours buchen huet Héichkonjunktur. Hei gëtt et eng Augmentatioun u Clientë par Rapport zu 2019. Bis ewell hunn iwwer 447.000 Leit vun dësen Offertë profitéiert. Et géif och ëmmer fréizäiteg gebucht ginn.

D'Situatioun op villen europäesche Fluchhäfe wier katastrophal. Um Findel wier d'Situatioun ënner Kontroll, mä net einfach, sou de Gilles Feith.

Wat déi ënnerschiddlech Reegelen a punkto Maskeflicht ugeet, bedauert de Gilles Feith, datt et nach ëmmer keng uniform europäesch Moossname gëtt.