Nieft der "alerte jaune" vum Nationale Wiederdéngscht wéinst den héijen Temperaturen, heescht et och beim Ozon opzepassen.

Um Sonndeg muss een tëscht 13 an 19 Auer am ganze Land mat Temperaturen tëscht 30 an 32 Grad rechnen. Laanscht d'Musel kann den Thermometer och nach 1 Grad weider klammen, heescht et op Meteolux.lu.

Dann ass et fir e Sonndeg tëscht 12 Auer an Hallefnuecht och d'Warnung, dass beim Ozon den europäesche Seuil d'information vun 180 µg/m³ kéint erreecht ginn. Hei gëllt souguer d'Vigilance orange.

Reen ass eréischt fir e Méindeg gemellt, awer mat 3 bis 5 Liter de Metercarré och net wierklech vill.

Den dréchenen a waarme Summer geet weider. An iwwerhaapt riskéiert d'Joer 2022 e Rekordjoer ze ginn, virun allem wat d'Dréchent ugeet.

D'Niveaue vun de Flëss a Baachen am Land wieren aktuell schonn extrem niddreg. Dat haaptsächlech am Norde vum Land.

Vun der Waasserverwaltung heescht et leschten Informatiounen no, dass d'Drénkwaasser-Versuergung zwar nach garantéiert wier, mä plazeweis géif et awer scho kritesch ginn. Dofir ass et och den Appell, am privaten op onnëtzt Waasser-Verbëtzen ze verzichten, an och net de Wuess ze nätzen oder den Auto ze wäschen.