Wéinst der wochelaanger Dréchent gëtt et an der nationaler Landwirtschaft ferme Abousse bei der Recolte.

Gras kéint dëst Joer keent méi erageholl ginn an de Mais wier an der Lescht carrement verdréchent. Dat féiert am nächste Wanter ganz sécher zu Enkpäss beim Fudder fir d'Béischten, well een es och net einfach am Ausland kafe kann. Do ass d'Situatioun änlech.

Dat schreift d'Baueren-Allianz an engem Communiqué, wou och déi aktuell geopolitesch Situatioun ronderëm den Ukrain-Krich kommentéiert gëtt. Déi international Agrar-Marchéë  wieren duerch de russeschen Iwwerfall aus der Spuer geroden an eis Ofhängegkeet vun Ueleg a Gas hätt Konsequenzen iwwer Joren ewech. Dofir huet d'Baueren-Allianz d'Regierung gefrot, fir am Hierscht en Agrar-Sommet anzeberuffen. Do sollen awer och méi generell Froen, wéi déi zukünfteg Ausriichtung vun der nationaler Landwirtschaft diskutéiert ginn.

A Frankräich geet een iwwerdeems vun Abousse bei der Recolte vu Geméis an de Friichten dëst Joer vu 25 bis 35% aus. Dat huet de President vun der franséischer Geméisbauere-Federatioun france-Info géintiwwer confirméiert. Gefrot gëtt elo eng besser Gestioun vum Waasser a staatlech Hëllefe vu Paräis.