Bei der Rettungsaktioun an enger Hiel zu Bäerdref war nieft dem GRIMP och de Rettungshelikopter vun der Air Rescue am Asaz.

Den 112 war kontaktéiert ginn, nodeems bei enger Expeditioun eng Persoun blesséiert gi war, well Steng an der Grott Sainte Barbe erofgefall waren. Eng Persoun war um Kapp getraff ginn a war net méi fäeg eleng aus der Hiel ze kommen.

De GRIMP (Groupe de Reconnaissance et d’Intervention en Milieu Périlleux) gouf op d'Plaz geschéckt, fir d'Persoun, déi eng 50 Meter wäit ewech vum Agang blockéiert war, erauszehuelen. Déi Rettungsaktioun war net sou einfach, well plazeweis waren d'Passagë sou enk, dass déi fir d'éischt emol méi breet gemaach hu musse ginn.

Den Asaz huet ganzer 6 Stonne gedauert, ma schlussendlech konnt d'Persoun vum Samu-Noutdokter behandelt ginn an du mam Rettungshelikopter an d'Spidol geflu ginn. Et besteet keng Liewensgefor. Eng 30 Pompjeeë waren am Asaz, dorënner der 15 vum GRIMP.

Et ware bedeelegt:
• GRIMP
• CIS Berdorf/Bollendorf
• CIS Junglinster
• SAMU
• Air Rescue
• CSL Ravitaillement

RTL

© CGDIS

Donieft gouf e Motocyclist blesséiert deen e Freideg den Owend géint 18.30 Auer tëscht Eschduerf an dem Heischtergronn gefall ass an zu Noutem ass eng Persoun an engem Autosaccident géint zwou Auer an der Nuecht op e Samschdeg verwonnt ginn. Detailer feelen hei.

Um 12.30 Auer koum et dunn zu engem Accident an der Stad. An der Rue de Trèves krut en Automobilist e Potto ze paken. Hei gouf keng Persoun blesséiert.

Um 14 Auer dunn e weidert Accident an der Rue principale zu Téiteng. Hei gouf eng Persoun verwonnt.

Zu Koplescht an der Rue de Mamer gouf e Cyclist vun engem Automobilist ugestouss. Och hei gouf eng Persoun blesséiert.

Änlech Virfall dann um kuerz no 17 Auer e Freideg de Mëtteg op der Place de l'Indépendance um Houwald. E Kand gouf hei vun engem Auto ugestouss a blesséiert. Hei ware Rettungswon, CIS a Samu aus der Stad am Asaz.