Wéi de CGDIS mellt, huet e Sonndeg géint 13.45 Auer op der Route d'Arlon an der Stad en Auto gebrannt. Et blouf beim Materialschued.

Dann huet et kuerz no 14 Auer nach zu Dikrech an der Avenue de la Gare gerabbelt. Hei sinn 2 Autoe anenee gerannt. Eng Persoun gouf verwonnt.

Weider mellt d'Police nach 2 Accidenter.

Zu Käerjeng hat e Chauffer e Sonndeg géint 16 Auer wéinst dem Wieder an der schlechter Siicht Foussgänger am leschte Moment eréischt gesinn, déi an der Avenue de Luxembourg iwwert d'Strooss gaange sinn. Beim Versich, en Zesummestouss z'evitéieren, gouf ee vun de Foussgänger mat niddereger Vitess erfaasst a koum dono  fir eng Kontroll an d'Spidol.

E Méindeg de Moien huet eng Persoun no engem Accident kuerz viru 7 Auer zu Holzem an der Garnecher Strooss missen aus hirem Won gebuerge ginn. Aus nach ongekläerte Grënn war den Auto vun der Souer ofkomm a war am Gruef gelant. De Mann gouf am Gefier ageklemmt a vun de Secouriste gebuergen. Hie koum an d'Spidol.