E puer Killtanke wieren duerch d'Feier explodéiert, wat een an Dikrech gutt héieren hätt. D'Rue de la Brasserie war wéinst dem Feier komplett blockéiert.

Am fréie Mëttwoch Nomëtteg gouf et e Groussbrand am Zentrum vun Dikrech bei der Brauerei, déi amgaangen ass, ofgerappt ze ginn. Hei huet de Killtuerm vum alen Deel vum Gebai gebrannt, deen net méi a Betrib ass. Op dëser Plaz wier awer alles schonn zanter Laangem ofgeséchert. E puer vun de Killtanke wieren duerch d'Feier explodéiert, wat op verschiddene Plazen an Dikrech gutt ze héiere gewiescht wier.

Betraff wier net, wéi an enger éischter Meldung, den Haapttuerm, dee jo ofgerappt soll ginn, mä den Tuerm mat de Killtanken.

D'Strooss tëscht der Brauerei an dem Lycée gouf wéinst dem Asaz komplett gespaart. Dem CGDIS no hätt et effektiv eng grouss Dampentwécklung ginn, well d'Isolatioun vum Gebai gebrannt hat. Dowéinst hat d'Police d'Bierger aus der Géigend och opgeruff, hir Fënsteren an Dieren zouzeloossen. D'Police huet matgedeelt, datt d'Ekippen op der d'Plaz de Brand géint 15.20 Auer ënner Kontroll haten an d'Feier ronn eng Stonn méi spéit gréisstendeels geläscht war. Eenzeg kleng Feiere waren nach un.

D'Ekippe vum CGDIS sinn net dovunner ausgaangen, datt sech d'Feier op aner Gebaier géif ausbreeden, och hätt keng Gefor fir d'Populatioun bestanen. Et waren eng 40 Pompjeeën am Asaz.

Schonn am Abrëll 2021 hat en anert Gebai vun der Brauerei zu Dikrech gebrannt.