D'CGFP léisst sech net vun hirem Cours ofbréngen, erkläert d'Staatsbeamtegewerkschaft no der publizéierter Etüd iwwert d'Paie vu Staatsbeamten.

An engem Communiqué kritiséiert d'CGFP de Minister fir d'Fonction publique, de Marc Hansen, schaarf, well deen d'lescht Woch eng Etüd iwwert d'Gehälter an der Fonction publique publizéiert huet. Den Inhalt vun der Etüd iwwerrascht d'CGFP net, well d'Gehälter beim Staat transparent wieren. Iwwerrascht ass se awer iwwert den Zäitpunkt vun der Publikatioun, well Verhandlungen iwwert en neie Gehälteraccord nämlech imminent sinn. De Marc Hansen hat d'lescht Woch hei op RTL gesot, d'Etüd gouf 2011 decidéiert a wier eben elo fäerdeg gewiescht.

D'Gewerkschaft freet sech, ob de Marc Hansen esou eng Näid-Debatt tëscht dem ëffentlechen a private Secteur provozéiere wollt, fir esou Drock op d'CGFP ze maachen. Dës fuerdert jo eng Punktwäert-Erhéijung, well et keng méi zanter 5 Joer gouf. Dës "Pick" vum DP-Minister wier de krasse Géigendeel vun engem iwwerfällege Merci fir dat onermiddlecht Personal an der Fonction publique, sou d'CGFP. D'Gewerkschaft betount, datt et och iwwerhaapt keng Studien iwwert d'Gehälter am Private géing ginn, fir e faire Verglach ze maachen.

E Mëttwoch de Mëtteg huet sech dann och de Generalsekretär vun der Handwierkerfederatioun Romain Schmit an dëser Fro zu Wuert gemellt. Wéi hien op Twitter geschriwwen huet, wier hie bei der CGFP. Et sollt eng Etüd gemaach ginn, fir d'Paie beim Staat mat deenen aus dem Privatsecteur ze vergläichen. An dëser misst dann och preziséiert ginn, wéi vill Leit wéi eng Pai bezéien a wéi eng Responsabilitéite si hätten.

De Marc Hansen hat selwer d'lescht Woch hei op RTL deklaréiert, d'Staatsbeamte misste "korrekt" bezuelt ginn an dat wier och aktuell de Fall. Ugeschwat op méi niddreg Karriären hat hie geäntwert, et misst een d'Verhandlungen ëm en neie Gehälteraccord an den aktuelle schwieregen Zäiten "kreativ" ugoen. D'CGFP notéiert aus dem Interview hei op der Antenn, datt de Minister zouginn huet, datt d'Resultater vun der Etüd duerch d'Iwwerstonne beaflosst wieren. Dat géing keng "Geldgier" vun de Beamten duerstellen, mee éischter e grave Personalmanktem erëmspigelen.

Aus der Etüd vum Ministère geet ervir, datt Beamten am Duerchschnëtt 8.688 Euro Brutto de Mount verdéngen (mam 13. Mount, mee ouni aner Accessoiren). Besonnesch d'A1- an A2-Karriären zéien d'Moyenne erop. Bei enger C1 ass een zum Beispill bei 5.758 Euro. Déi ganz Etüd fannt Dir hei.

"Ënneschte politesche Niveau"

D'Etüd iwwert d'Accessoiren an der Fonction publique wier scho viru Jore fäerdeg gewiescht. Dat huet de President vun der CGFP Romain Wolff – eegenen Aussoen no – viru Joren aus anere Kreesser héieren. Am RTL-Interview seet de Romain Wolff, datt d'Publikatioun elo just virun de Verhandlungen ëm en neie Gehälteraccord "politesch motivéiert" an "ënneschte politesche Niveau" wier.

De Marc Hansen hat wéi gesot hei op der Antenn gesot, d'Etüd wier elo publizéiert ginn, well se eben elo fäerdeg gewiescht wier. De Romain Wolff wëll net soen, datt de Minister onéierlech wier, mee stellt fest, datt Sozialnäid géing ugestëppelt ginn. Hie freet sech: "hu mir am Moment keng aner Problemer ewéi dat do?" Et wier net ze gleewen, datt d'Regierung sech op deen Niveau géing erofloossen.

De Romain Wolff betount och, datt 2016 ofgemaach gi war, datt d'Accessoiren, also Primmen, Indemnitéiten oder aner Supplemente sollten ënnert d'Lupp geholl ginn an net d'Gehälter. De President vun der CGFP ënnersträicht och, datt vill Leit an der Fonction publique eben net op den Duerchschnëttsgehalt vun 8.688 Euro Brutto de Mount kommen, deen de Minister an d'Fënster gestallt huet. Donieft géing bei deene Gehälter no de Steieren d'Hallschent iwwereg bleiwen, well d'Barèmen net un d'Inflatioun ugepasst ginn.

D'Verhandlungen iwwert en neie Gehälteraccord beim Staat ginn un, soubal d'CGFP der Regierung hire Fuerderungskatalog presentéiert. Dat géing normalerweis virun Enn vum Joer geschéien, mee hie kéint sech nach net zu 100% festleeën, sou de Romain Wolff.