Wéi all 1. Freideg am Mount hu mer an eiser Emissioun am Gespréich iwwer Sport tëscht 12 an 13 Auer eng Table ronde.

Dës Kéier mat de Lëtzebuerger Sportler vun den Europaspiller zu Minsk. Invitéë beim Rich Simon a Franky Hippert waren d‘Dëschtennisspillerin Ni Xia Lian, de Badmintonspiller Robert Mann, deen och de Lëtzebuerger Fändel bei der Ouvertureszeremonie eragedroen huet, den Trapschéisser Lyndon Sosa, d‘Karateka Jenny Warling an de Bouschéisser Gilles Seywert.

Mat den Cosl-Athlete hu mer iwwert hir Impressioune geschwat, déi si aus der wäissrussescher Haaptstad matbruecht hunn a wat am Lëtzebuerger Sport nach muss geschéien, fir méi no un déi europäesch Elite erunzekommen.

AUDIO: Am Gespréich iwwer Minsk/Reportage Franky Hippert

Si hunn dann och 3 Medaile vu Minsk matbruecht. Bronz fir d'Ni Xia Lian am Dëschtennis a fir d'Jenny Warling am Karate. De Gilles Seywert hat esouguer Sëlwer an der Wallis. De Bouschéisser huet awer och duerch seng positiv Astellung an säi relâchéiert Optrieden, d'Lëtzebuerger Delegatioun ugestach.

D'Ni Xia Lian huet scho 4 Olympesch Spiller hannert sech, fir déi 5. d'nächst Joer zu Tokio huet si sech zu Minsk qualifizéiert, a mat zanter en Donneschdeg hire 56 Joer erlieft d'Ni Xia Lian nach ëmmer onmoosseg Saachen.

K.O. geschloen an awer Bronz gewonnen, huet et fir d'Karateka Jenny Warling geheescht, déi eis e Freideg en éischten Interview nom hirem Match e Sonndeg konnt ginn.

De Badmintonspiller Robert Mann hat bei der Ouvertureszeremonie d'Éier, de rout-wäiss-bloe Fändel an den Dinamo Stadion eranzedroen.

Fir den Trappschéisser Lyndon Sosa waren et no Baku viru 4 Joer seng zweet Europaspiller. Bei esou engem Multisportevenement muss ee sech och emol fir d'éischt u verschidden Aflëss gewinnen.

D'Europaspiller stiechen nach an de Kannerschong. Zu Minsk war et jo eréischt déi zweet Editioun. Zu Krakau a Polen kann een dann a 4 Joer dovun ausgoen, datt d'Popularitéit vun de European Games beim Grand Public a Westeuropa lues a lues klëmmt.

AUDIO: Am Gespréich - Spezial Minsk 2019

D'Emissioun "Am Gespréich ..." vu méindes bis freides tëscht 12 an 13 Auer op RTL Radio Lëtzebuerg an am Livestream op RTL.lu, wou duerno och de Replay (Audio a Video) ze fannen ass.