D'Grande-Duchesse huet eng nei Lëtzebuerger Asbl "Stand Speak Rise Up!" an d'Liewe geruff, fir den Affer vun de schlëmmsten Doten eng Stëmm ze ginn.

Den Iwwerliewende vun Viol a Gewalt a Biergerkrichsgebidder e Gesiicht ginn, eng Bün bidden, fir vun hirem enorme Leed ze schwätzen. Donieft gëllt et, si net ze stigmatiséieren, mä dësen Affer am Prozess vum psychologesche Verschaffe begleeden.

Dat wëll déi nei Lëtzebuerger asbl "Stand Speak Rise Up!", déi vun der Grande-Duchesse an der Suite vun engem Forum am Fréijoer an d'Liewe geruff gouf.

De Verwaltungsrot vun der Associatioun war dëse Weekend eng éischte Kéier am Schlass Bierg beieneen.

Alles an allem zielt dëse benevole Conseil nieft dem kongoleseschen Nobel-Präis-Laureat Dr. Denis Mukwege nach 15 aner Memberen, dorënner de Peter Maurer vum Internationale Roude Kräiz, de Jean-Christophe Rufin vun der Académie Française, den Deputéierte Charel Margue, de Muhammed Yunus oder och d'Pramila Patten, Spezial-Representante vun der UNO.

Firwat dës Initiative a firwat et wichteg bleift, iwwert d'sexuell Gewalt als Krichswaff ze schwätzen an e Plädoyer fir d'Affer ze halen, doriwwer huet de Roy Grotz  mat der Grande-Duchesse Maria Teresa geschwat.

Zu de konkreten Projeten, déi d'asbl ewell op der Lee huet, ass d'Extensioun vum Spidol zu Panzi (Demokratesch Republik Kongo) zesumme mat der Lëtzebuerger Croix-Rouge, dem Kooperatiounsministère an der Fondatioun Mukwege. Grad wéi och der Projektioun am Dezember (10-11.12.) an der Stater Cinemathéik vu Filmer iwwert Konfliktregiounen, a wat do mussen d'Affer vu Kricher erdroen.

Wien d'Cause vun der Grande-Duchesse an domat d'asbl "Stand Speak Rise Up!" wëll finanziell ënnerstëtzen, kann dëst mat engem Don via d'Fondation du Grand-Duc et de la Grande-Duchesse IBAN CCPL LU33 1111 0001 6669 0000 (steierlech ofsetzbar).

D'Emissioun "Am Gespréich ..." vu méindes bis freides tëscht 12 an 13 Auer op RTL Radio Lëtzebuerg an am Livestream op RTL.lu, wou duerno och de Replay (Audio a Video) ze fannen ass.