E Samschdeg de Mëtteg war de Gilbert Pregno eisen Invité vun der Emissioun "Background am Gespréich".

Background am Gespréich: Gilbert Pregno

Fir vill Familljen ass déi aktuell Situatioun e risege Problem, dat sot e Samschdeg de Mëtteg de Psycholog a President vun der consultativer Mënscherechtskommissioun Gilbert Pregno bei eis am Background. Besonnesch déi Leit, déi schonn diskriminéiert sinn, hätten et och elo am schwéiersten.

Haart Wieder huet de Gilbert Pregno iwwert d'Realitéit an den zouene Strukturen, virop den Altersheemer fonnt. Iergendwann hunn ech mer gesot, datt ech frou sinn, datt mäi Papp virun zwee Joer gestuerwen ass, sou eisen Invité e Samschdeg. D'Situatioun an den Altersheemer wier dramatesch. Leit wieren och haut nees agespaart. Ma et wier eng Wiel tëscht Pescht a Cholera.
Déi psychesch Gesondheet awer hätte mer an der Pandemie negligéiert. Och de Klengkandberäich géif hei am Land negligéiert, fënnt de Kannerpsycholog Gilbert Pregno. Kleng Kanner missten engem an d'Gesiicht kënne kucken, ouni Mask. Ville Kanner a ville Jugendlecher géif et hei am Land ëmmer méi schlecht goen. Ob et méi Gewalt doheem während dem Lockdown gouf, wier nëmme ganz schwéier soen. Déi eng Familljen hätten de Confinement ganz positiv erlieft, anerer, notamment a klenge Wunnengen, hätten méi negativ Erfarunge gemaach.

Wat den Ament geschitt hätt gravéierend Konsequenze mëttel- a laangfristeg, dovunner ass de President vun der consultativer Mënscherechtskommissioun iwwerzeegt. D'Gesellschaft misst eppes Neits fir eist Zesummeliewen erfannen. Nach eng Kéier wier Solidaritéit an Zesummenhalt gefuerdert. Virun allem misst d'Gesellschaft sech och en Vue vun anere Pandemië besser opstellen.

De President vun der consultativer Mënscherechtskommissioun huet och festgestallt, datt d'Leit sech séier u Fräiheetsbeschränkunge winne géifen. Dat wäert elo och sou bleiwen, mengt de Gilbert Pregno. Un d'Regierung war et de Rot en eegene Wee am Ëmgang mat der Pandemie ze fannen an net nëmmen d'Ausland ze kopéieren.

Resumé Background
Radio - Background: Gilbert Pregno

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.