E Samschdeg ass de Luc Frieden eisen Invité an der Emissioun Background am Gespréich um Radio.

D’CSV-DP-Regierung hätt scho villes vun deem, wat se versprach hätt, ëmgesat. Pensiounsreform, d’Logementskris, d’Zukunft vum Gesondheetssystem, d’Regierung géing all déi Dossieren ugoen, déi am Koalitiounsprogramm stinn, a si wier um gudde Wee. Och wann een net ëmmer jidderee kéint zefridde stellen. Dat seet de Lëtzebuerger Premierminister Luc Frieden als eisen Invité an der Emissioun Background am Gespréich mat Bléck op zwee Joer Schwaarz-Blo-Regierung.

"Politik ass komplizéiert"

Et wiere bis elo spannend zwee Joer gewiescht. Um Wee vun der Ëmsetzung géing een natierlech och déi begéinen, déi net mat deem Koaltiounsprogramm averstane sinn. Déi géinge sech äusseren an dat wier och gutt an enger Demokratie. Domat misst ee sech ausernee setzen. Zil vun der Regierung wier et awer, dat ëmzesetzen, wat een am Walkampf versprach hätt. Dat wier de Kompass, esou de Regierungschef.
 
Wat d’Logementskris ugeet, do hätt d’Regierung eng ganz Rei Mesuren en place gesat, fir "de Problem méi kleng ze maachen". Déi hätten en Impakt, mee do misst een awer nach weiderschaffen. Och d’Gemenge géingen dobäi eng wichteg Roll spillen.

Méi Kannergeld 2027

Am Kampf géint d’Aarmut wär ënnert anerem virgesinn, datt 2027 d’Kannergeld soll erhéicht ginn. Besonnesch fir d’Kanner iwwer zwielef Joer. Ëm wéi vill d’Kannergeld soll an d’Luucht goen, huet de Luc Frieden awer net gesot. Dat misst een nach an der Regierung diskutéieren. E weidere ganz wichtegen Dossier déi nächst Méint wier d’Santé. D’Konventionéierung soll bleiwen, méi Aktivitéite solle baussent de Spideeler méiglech sinn, och ouni Tutelle vun de Spideeler, a Gesellschafte fir d’Doktere solle geschaf ginn, wou nëmmen Dokteren dierfen dra sinn. D’Zuel vun de Spidolsbetter soll och an d’Luucht gesat ginn. Bis de Summer d’nächst Joer missten déi Punkte stoen, huet de Premier an CSV-Parteipresident betount.

Onkloer, ob de Luc Frieden weider CSV-President bleift

An à propos Parteipresident: Do huet de Luc Frieden sech net an d’Kaarte kucke gelooss, ob hien d’nächst Joer um nationale Kongress vu senger Partei nach eng Kéier fir d’CSV-Parteipresidence kandidéiert. Ausschléisse géing hien dat awer op alle Fall net. Och wann et ganz vill Aarbecht wier, esou de Premier, deen an deem Kontext zouginn huet, datt e warscheinlech méi misst um Terrain sinn. Dat géing hie gären als Kritik acceptéieren. Mä hie wär vill um Büro, dat wär hien och scho fréier als Minister vill gewiescht. Dat wär e bësse säi Wiesen.

Keng Regierungsëmbildung geplangt
 
Op d’Stëmmung an der Koalitioun ugeschwat, seet de Luc Frieden déi wier ganz gutt, esouwuel politesch, ewéi mënschlech gesinn. Et géing een alles gemeinsam ëmsetzen. Hie kéint net soen, et wier alles wonnerbar, mee si wiere ganz gutt zesumme virukomm. D’Regierung ëmzebilden wier iwwerdeems net virgesinn. Et gouf jo Rumeuren, datt d’Ministere Georges Mischo a Martine Deprez kéinten ausgewiesselt ginn. Dat wär net virgesinn, sou de Luc Frieden. Et misst ee weider de Regierungsprogramm ëmsetzen.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.