Virun 30 Joer ass d'Mauer gefall an d'Trennung vun Däitschland an een Ost- an ee Westdeel war Geschicht. An elo kënnt déi ganz Wourecht eraus: Et war net den David Hasselhoff deen d'Mauer ewech gesongen huet, mä de Verdéngscht vum Spirou, wéi seng neist Aventure, Spirou à Berlin, elo ënnersträicht.

12/11/2019 BD (Dee laange Reportage iwwert Spirou in/à Berlin

Dobäi ass déi guer net esou nei, well d'Original "Spirou in Berlin" ass scho virun engem gudde Joer an Däitschland erauskomm, vun engem däitschen Auteur, dem Flix, realiséiert.

D'Geschicht fänkt am Wanter 1988 un, spillt awer virun allem am Hierscht 1989. Zu engem Zäitpunkt wéi d'Mauer zu Berlin nach stoung. An de Spirou, als Held, gëtt do mat enger Situatioun konfrontéiert, an där hie fir d'Fräiheet kämpfe muss. Seng eegen, déi vu senge Frënn, an onfräiwëlleg och fir déi vu Milliounen anere Mënschen. Dobäi ginn an der Geschicht, déi zwar virun allem eng grouss Aventure mat ville witzege Situatiounen ass, och vill Wourechten a Kritiken um fréiere Régime duergestallt.

Et ass éischter rar, datt eng Geschicht an enger Bande Dessinée wéi dem Spirou esou präzis un eng Zäit gebonnen ass. An awer bleift Spirou in Berlin, duerch d'Manéier wéi d'Geschicht erzielt gëtt, nach ëmmer aktuell.

An der Traditioun vun de klassesche Bande Dessinées Serien, stécht och dësem Album voll klenger Detailer, déi engem méi proposéieren, ewéi just d'Aventure u sech. Déi maachen, datt een och wann een d'Geschicht e puer mol liest, ëmmer nach nei Detailer entdeckt. A well d'Geschicht hei op dräi Plaze spillt, an der Belsch, zu West- an zu Ostberlin, konnt de Flix sech do austoben

D'Bande Dessinée ass am Original op däitsch, Spirou à Berlin ass eng Iwwersetzung. A wéi dat bei Iwwersetzungen esou ass, geet do och mol eppes verluer. Verschidde witzeg Situatiounen zum Beispill, wéi déi typesch Berliner Manéier fir ze schwätzen, oder Uspillungen, wann de Grof vu Champignac zum Beispill seet: "Die Mauer muss weg". Eng Uspillung un eng Ausso, déi dacks dem fréiere Westberliner Buergermeeschter Willy Brandt an de Mond geluecht gëtt, an dat erëmgëtt, wat déi meescht Berliner geduecht hunn. Ee franséischsproochege Lieser wäert mam Saz: "Ce mur doit disparaître" net esou vill ufänke kënnen.

Datt de Flix genee dee richtegen Auteur fir dëse Spirou ass, weisen déi vill Detailer déi ënnersträichen, wéi gutt hien den Universum vum Spirou kennt. Säi grousst Virbild ass den André Franquin, deen och als eenzege Spirou Auteur an der Widmung um Enn vum Album ernimmt gëtt. De Sënn fir den Detail fënnt een och bei deenen Zeenen, déi net zu Berlin spillen, mä nach zu Bréissel, wou d'Redaktioun vun der Zeitung Moustique ass, fir déi de Spirou an de Fantasio jo schaffen. Do sti vill franséisch Titelen op den Zeitungen, a keng däitsch Iwwersetzungen. An op engem Stroosseschëld steet och Champignac, an net Rummelsdorf, wéi d'Uertschaft an där de Grof vu Champignac wunnt, an der däitscher Versioun heescht. De Flix situéiert och als éischten Auteur iwwerhaapt, wou Champignac iwwerhaapt läit.

No deem do Album huet de Flix och bewisen, datt hien ouni Weideres capabel wier, fir d'Haaptserie als offiziellen Auteur ze betreien, wann de Yoann an de Vehlmann, déi den Ament déi offiziell Equipe sinn, ophale géifen.