Hilda ass eng Serie vum engleschen Auteur Luke Pearson, déi mat deem sechsten Album op en Enn geet. Op d'mannst mol am Comicformat, well op Netflix lieft d'Serie als Zeechentrickfilm weider. Dëst Joer soll déi zweet Staffel erauskommen.

07/01/2020 BD (Hilda et le Roi de la Montagne)

D'Hilda ass ee klengt Meedchen, dat mat senger Mamm an enger klenger Häip am Bësch lieft. Do begéint hatt deene gelungenste Kreaturen an erlieft, mat deenen, spannend Aventuren.

Mä dem Hilda seng Mamm wëll op Trollberg plënneren, wat dem Hilda guer net gefält, well hatt fäert, seng Frënn ze verléieren. Dobäi gëtt et och an der Stad esou munch spannend Aventure ze erliewen, mat neie Frënn. Mä och an der grousser Stad liewe Kreaturen, déi nëmmen d'Hilda gesäit.

Déi 13 Episoden déi elo schonn op Netflix sinn, bauen zum Deel och op d'Bande Dessinées Albumen op. Dee leschten Album, dee muer an der franséischer Iwwersetzung bei Casterman erauskënnt, erzielt d'Geschicht, wéi d'Hilda Trollberg rett, an et fäerdeg bréngt, datt d'Mënschen an d'Trollen endlech friddlech an ouni Angscht zesummeliewe kënnen.

Hannert de Biller, déi op den éischte Bléck kannereg wierken, huet de Luke Pearson een Universum opgebaut, dee voller Detailer stécht. Universell Iddien wéi Frëndschaft, Respekt an Oppenheet huet hien doran op eng ganz verspillt Manéier verschafft, a vermëttelt esou och Wäerter iwwert seng Geschichten, déi sech an éischter Linn natierlech u Kanner riichten, mä iwwert dat wat tëscht den Zeile kann erausgelies ginn, och bei engem Erwuessene Publikum een Nerv trëfft.

D'Adaptatioun op Netflix huet schonn een Deel vun der Geschicht aus dësem leschten Album an hirem éischten an zweeten Episod verschafft. Si bleift dem Grondgedanken vum Comic trei, erzielt op déi selwecht Kandgerecht Manéier spannend a witzeg Geschichten, an deene méi dra stécht ewéi et op deen éischte Bléck wierkt.

"Hilda et le Roi de la montagne" ass den Titel vun deem leschten Album vun der Bande Dessinée ronderëm d'Hilda, dat klengt Meedche mat bloen Hoer, dat net nëmmen Trollen an aner Fabelwiesen als Frënn huet. Deen Album ass am September an der Originalversioun an och schonn an der däitscher Iwwersetzung erauskomm, déi franséisch Iwwersetzung fannt Dir vu muer un an de Butteker.