Meeschtens ass et esou: fir d'éischt gëtt et e Buch aus deem dann en Dréibuch an eben e Film gemaach gëtt. Mä heiansdo ass d'Geschicht och ëmgedréint an d'Buch kënnt eréischt nom Film. Dat ass de Fall fir dem Gabriel Katz säi Roman "Au bout des doigts", deen elo och an der däitscher Iwwersetzung mam e bëssi schwéierfällegen Titel "Der Klavierspieler vom Gare du Nord" erauskomm ass. Christiane Kremer

13/08/2019 Buch vun der Woch "Der Klavierspieler vom Gare du Nord" Gabriel Katz

Dat ass de Prélude et fugue Nummer 2 vum Johann Sebastian Bach--- eng Melodie gespillt op engem Piano mattsen an der Gare du Nord zu Paräis. De jonke Mann, deen drop spillt ass de Mathieu, 20 Joer al, aus der Banlieue, deen eleng mat Mamm a Brudder lieft, net grad de beschten Ëmgang huet an deemno och vun der Police gesicht gëtt. Mä spille kann en, dat huet ee vun den Zoufalls-Nolauschterer direkt spatz. Dobäi ass dat och net egal wien: de Pierre Geithner ass den Direkter vum Paräisser Conservatoire, dee beandrockt ass vum Spill vum Mathieu an deen alles probéiere wäert de jonke Mann an d'Coursen a säin Haus ze kréien.

Iwwer eng mëssgléckten Déifstallgeschicht passéiert et dann tatsächlech. De Pierre kritt dem Mathieu seng Strof a Sozialstonnen ëmfunktionnéiert, dat heescht Botzen am Conservatoire, mä ganz séier ginn doraus Pianos-Stonnen bei der beschter Proff aus dem Haus, der Contesse, déi déi Saach awer skeptesch kuckt.

De Pierre Geithner mécht dat Ganzt och net just aus purem Matgefill, mä erhofft sech selwer en neien Opdriff a senger Karriär. De Mathieu soll beim prestigiéise Grand-Prix d'excellence säin Haus vertrieden mat dem schwéiere Pianoconcerto 2 vum Rachmaninov. Mä ass dee volatilen, jonke Mann dee Richtegen a staark genuch dofir? De Geithner gleeft un en, grad wéi och déi jonk Cellistin Anna.

E gudde Plott, dee funktionnéiere kann, sou denkt ee sech an am Fong ass en dat och: sympathesch Figuren, déi sech selwer an de Féiss stinn, grouss Erausfuerderungen an eng gemeinsam Passioun: d'Musek. E Buch, dat sech duerch de flëssege Stil gutt a séier liest.

Mä eng Grëtz previsibel ass d'Geschicht schonn. Ausserdeem hunn ech mech permanent beim Gedanken ertappt, datt ech éischter en Dréibuch gelies hu wéi e Roman, ouni du schonn ze wëssen, datt et grad just op engem Dréibuch baséiert.

De Gabriel Katz ass Auteur vu Jugend- a Fantasybicher an huet och schonn Dréibicher fir Televisiouns-Serie geschriwwen. Dat hei ass säin éischte Roman, deen en op Basis vum Zenario vum Ludovic a Johanne Bernard geschriwwen huet. De Film "Au bout des doigts" ass Enn vum leschte Joer an de Kinoe gelaf, och zu Lëtzebuerg. An den Haaptrollen Lambert Wilson, Kristin Scott Thomas an de jonke Jules Benchetrit, Fils vun der onvergiessener Marie Trintignant.

Eréischt nom Film koum och d'Buch eraus, dat elo an der däitscher Iwwersetzung do ass.

"Der Klavierspieler vum Gare du Nord" ass bei S. Fischer erauskoum. Am Original "Au bout des doigts" bei Fayard.