Zwee Lëtzebuerger Auteuren verroden Iech haut wat si momentan esou liesen. Den Tullio Forgiarini huet sech scho laang etabléiert. Säi Roman "Amok" ass jo ënnert dem Titel "Baby alone" an de Kino komm, krut 2013 den europäesche Literaturpräis a gouf mëttlerweil  och op Italienesch iwwersat. De Jean Beurlet, besser bekannt als Jean Bürlesk huet grad emol 27 Joer, a krut viru kuerzem de Prix d'Encouragement vun der Fondation Servais zougesprach. D'Bea Kneip präsentéiert iech hir Buchtipps.

05/09/2019 Lecture vun heiheem: Buchtipps vum Tullio Forgiarini a Jean Bürlesk

E schreift wuel dacks op Franséisch, mä säi bekanntstent Buch huet en op Lëtzebuergesch verfaasst a säi Roman "Lizardqueen" ass op Däitsch geschriwwen. Fir säi Buchtipp vun haut bleift den Tullio Forgiarini awer bei der Sprooch vum Molière:
De Patrick Modiano, ënner anerem Laureat vum Prix Goncourt, a vum Literatur-Nobelpräis 2014, huet 10 vu senge Romaner an Texter erausgesicht, déi ënnert dem Titel "Romans" an der Kollektioun "Quarto" bei Gallimard publizéiert goufen, dorënner och seng Autobiografie "Un pedigree". Säin neitste Roman mam Titel "Encre sympathique"  soll iwwregens den 3ten Oktober erauskommen.

E ganz anere Genre proposéiert de Jean Bürlesk. Den zweete Juli konnt hie jo de Prix d'Encouragement vun der Fondation Servais entgéinthuelen, dat fir seng Kuerzgeschichtesammlung "The pleasure of drowning". Hei gräift e bekannte Mäerercher a Legenden op, spillt domat an interpretéiert se op seng eegen originell an erfrëschend Manéier. Science Fiction a Fantasy hunn him et och als Lieser ugedoen. Zum Beispill dat heiten: "The house of shattered wings" vun der Aliette de Bodard.
Déi franséisch-vietnamesesch Schrëftstellerin Aliette de Bodard gouf 1982 an den USA gebuer, opgewuess ass si zu Paräis. Mat hire Romaner déi dacks op enger alternate history baséieren, déi also spekuléieren wat wier, wann dëst oder dat an der Weltgeschicht anescht ofgelaf wier, konnt si eng beandrockend Panoplie vu Präisser am Fantasy-Beräich sammelen. Dem Jean Bürlesk seng recommandatioun "The house of shattered wings" gëtt et och an anere Sproochen, zum Beispill op Däitsch mam Titel "Das Haus der gebrochenen Schwingen".
De Jean Bürlesk huet awer nach e Buchtipp:
"Across the Nightingale Floor" vun der Lian Hearn.
Hannert dem Pseudonym Lian Hearn verstoppt sech déi gebierteg Englännerin Gillian Rubinstein. Hiren Débutroman "Space Demons" ass 1987 erauskomm. D'Trilogie "Tales of the Otori" spillt an engem fiktiven Inselstaat dee staark u Japan an der Feudalzäit erënnert. "Across the nightingale floor" ass den éischten Deel vun dëser Trilogie mat deem si iwwregens 2004 den däitsche Jugendliteraturpräis gewanne konnt. Natierlech gëtt et och heivunner eng däitsch Iwwersetzung, mam Titel: "Das Schwert in der Stille" 
  

Villäicht ass bei dëse Summer-Buchtipps jo och eppes fir Iech dobäi, all Detailer kënnt Dir nach eng Kéier op rtl.lu noliesen, an der Rubrik "Bicher".

"Romans" Patrick Modiano (Gallimard)
"The House of Shattered Wings" Aliette de Bodard (Gollancz)
"Across the Nightingale Floor" Lian Hearn (Picador)