De Schwäizer Auteur Roland Buti schreift original op franséisch a krut an der Vergaangenheet dofir schonn eng Rei Auszeechnungen a senger Heemecht. Seng Bicher ginn awer och ëmmer séier an déi aner offiziell Sproochen aus der Schwäiz iwwersat: op italienesch an op däitsch. D'Christiane Kremer huet säi leschte Roman "Grand National" an der däitscher Versioun gelies "Das Leben ist ein wilder Garten".

08/09/2020 Buch "Das Leben ist ein wilder Garten" vum Roland Buti

De Carlo Weiss ass Landschaftsgärtner, e Beruff deen e gär huet, well en d'Natur gär huet. Eigentlech ass en en zefriddene Mënsch, mä eleng. Vill eleng, zënter datt seng Fra Ana hie verlooss huet. Hien hätt net genuch Versteesdemech fir si an hire Beruff, deen esou vill Sensibilitéit verlaangt. D'Ana ass Infirmière. Vläicht ass d'Liewen zesummen och net méi ganz spannend, besonnesch zënter hir Duechter decidéiert huet an England Konscht ze studéieren an hir Eltere waméiglech wäit vum Schoss ze halen.

Am meeschte Kontakt huet de Carlo mat sengem Mataarbechter Agon, e Bierg vun engem Mann, deen aus dem Kosovo kënnt a sech mat vill Engagement ëm säin Job a säi Gaart këmmert, bis en enges Daags op brutal Manéier zesummegeschloe gëtt.
Dat ass déi eng Opreegung am Carlo sengem bal scho langweilegen Alldag. Déi aner ass déi, datt seng demenzkrank Mamm Pia op eemol, mir näischt, dir näischt aus dem Altersheim verschwënnt an am Hotel "Grand National" an hirem Heemechtsduerf optaucht. Do huet se sech aquartéiert a refuséiert nees auszechecken. De Carlo muss, op der Sich no hir, erkennen, datt hie wéineg vu senger Mamm weess a vrun allem vun hirer Vergaangenheet, déi wärend dem zweete Weltkrich méi opreegend a glamouréis war, wéi ee mengt.

De Roland Buti, Auteur, Historiker an Enseignant, beweist och a sengem fënnefte Roman, datt hien en Don huet fir Atmosphär ze schafen. Besonnesch mat der detailléierter, awer net langweileger Beschreiwung vu senge Personnagen an hire Gefillszoustänn, oder och vun der Natur an där se sech alleguer wuelfillen, mengt een als Lieser ganz genee ze gesinn, ze richen, ze héieren, ze spieren, wat alles passéiert.

Just et passéiert net vill. De Roman, oder Kuerzroman bitt net esou vill Handlung, datt een duerch eng enorm Spannung vu Säit zu Säit gedriwwe gëtt. Et léisst ee sech mat enger Portioun Melancholie duerch d'Gefillswelte vun de Personnagen féieren. Et ass deemno eng Geschicht, déi een derzou bréngt, emol zeréckzeschalten an d'poetesch Sprooch ze genéissen. Och wann een e bëssi "sur sa faim" bleift. Iwwer déi glamouréis Vergaangenheet vun der Mamm, hätt ech schonn nach gär méi gewosst oder iwwer den Agon a seng Geschicht. Oder d'Relatioun tëscht dem Carlo an dem Ana.

"Das Leben ist ein wilder Garten" vum Roland Buti ass op däitsch am Verlag Zsolnay erauskomm.