"Das Mädchen, das ein Stück Welt rettete" vun der Sharon Cameron ass eist Buch vun dëser Woch. Firwat een dat onbedéngt, a ganz besonnesch an dësen Zäite, liese sollt, dat verréit eis d'Bea Kneip

03/11/2020 Buch vun der Woch: "Das Mädchen, das ein Stück Welt rettete"

D'Handlung schéngt esou onwahrscheinlech, dass een dat engem Romanauteur sécher net ofkafe géif. Mä den Ënnertitel seet et schonn: "Nach einer wahren Geschichte". Et ass d'Geschicht vum Stefania Podgorska, oder Fusia, wéi et meeschtens genannt gëtt. Dat jonkt Meedchen lieft an enger polnescher Klengstad, a schafft am Buttek vun der jiddescher Famill Diamant. Den Izio, ee vun hire Jongen, ass seng grouss Léift. Mä du kënnt de Krich an d'Famill Diamant gëtt am Ghetto agespaart. D'Fusia mécht wat e ka fir hinnen ze hëllefen, mä nëmmen de Max, dem Izio säi Brudder, ka sech virun der Deportatioun retten. Dat 18 Joer jonkt Meedchen, dat sech iwwerdeems och nach ëm seng kleng Schwëster Helena këmmere muss, decidéiert fir hien, an 12 aner Judden, bei sech um Späicher ze verstoppen. Dat couragéiert jonkt Meedchen a seng Gäscht geroden doduerch méi wéi eng Kéier a Liewesgefor...

D'Stefania Podgorska gouf 1921 gebuer. Nom Krich huet si sech mam Max Diamant bestued, d'Koppel ass 1958 fir d'éischt an Israel geplënnert, an duerno an d'USA, wou d'Stefania 2018 am Alter vu 97 Joer gestuerwen ass. 
D'Sharon Cameron ass eng US-amerikanesch Kanner a Jugendbuch-Autorin. Ugangs der 90er Joren hat si op enger lokaler Teles-Chaîne en Interview mat der Stefania Podgorska gesinn, allerdéngs huet et nach eng Kéier méi wéi 25 Joer gedauert bis si decidéiert huet, doraus e Buch ze maachen. Dobäi konnt si sech op der Stefania hir eegen onverëffentlecht Memoire baséieren, huet allerdengs an Zesummenaarbecht mat der Famill nach zousätzlech recherchéiert. 

"Das Mädchen, das ein Stück Welt rettete" ass e Buch dat een net méi vergiesse kann. Déi zwou Schwësteren Stefania an Helena Podgorska hunn en onvirstellbare Courage bewisen, a grad esou onvirstellbar waren déi Konditiounen ënnert deenen déi 13 Mënschen um Späicher hu missten aushalen, méintelaang, ouni sech dierfen ze mucksen. A wann een hautdesdags d'Flemm huet fir mussen doheem ze bleiwen, da soll een sech roueg eng Kéier doriwwer Gedanke maachen... 

"The Light in Hidden Places" vun der Sharon Cameron ass an der däitscher Iwwersetzung am Insel Verlag erauskomm, mam Titel "Das Mädchen, das ein Stück Welt rettete"