Wann een an de Bicherbuttek geet, kann et virkommen, datt ee komplett erschloen ass vun der grousser Offer. An dofir hu mir mam Buch vun der Woch vum briteschen Auteur a Journalist Matt Haig eng flott Propos fir Iech. Kennt Dir villäicht e Roman vun him? Tiffany Saska huet säin aktuelle Roman „Die Mitternachtsbibliothek“ gelies a war begeeschtert.

04/05/2021 Buch "Die Mitternachtsbibliothek" vum Matt Haig

D´Nora Seed ass a sengem Liewen un engem Punkt ukomm, wou et keng Alternativ méi gesäit, an decidéiert sech d´Liewen ze huelen. Dës Entscheedung féiert hatt an di sougenannte Mitternachtsbibliotheik. Gefëllt mat enger Onmass u Bicher, steet all eenzel Buch an dëser Bibliothéik fir en anert Liewen, wat di jonk Fra hätt kënne féieren. D´Nora huet elo d´Méiglechkeet verschidde Liewen auszeprobéieren. Zu all Moment kann hatt sech awer och géint dëst ausgewielte Buch bzw. Alternativliewen entscheeden, kënnt nees zréck an d´Mitternachtsbibliotheik, a probéiert einfach en neit Liewen aus. Mee kann d´Nora iwwerhaapt an engem anere Liewe glécklech ginn?


De Matt Haig werft mat sengem Roman „Die Mitternachtsbibliothek“ Froen op, di ganz ville Leit scho begéint sinn. Wat wär gewiescht wann… hunn ech falsch Entscheedunge getraff…. bereien ech Decisiounen a mengem Liewen? Di ganz entscheedend Fro ass awer: hätt ech et wierklech wëllen anescht maachen oder ass et ok, wéi et ass? D´Nora, dat d'Depressiounen huet, gëtt vum Liewen dozou invitéiert fir erauszefannen, ob en anert Liewe mat aneren Entscheedungen hatt tatsächlech méi glécklech gemaach hätt. Den Auteur, dee selwer zënter ville Joren Depressiounen huet, setzt sech an all senge Romaner mam Liewen a sengen diversen Erausfuerderungen auserneen. Him ass mam Buch “Ich und die Menschen“ den Duerchbroch gelongen, mee ech hunn hie bis elo net kannt, ma war direkt begeeschtert.

Den Ausgangspunkt vun der Geschicht ass eng depressiv Fra, déi sech fir de Suicide entscheet - eng schrecklech Situatioun also. Mee ech denken ech verroden net ze vill, wann ech behaapten, datt de Matt Haig e Roman fir d´Liewe geschriwwen huet. Seng Aart a Weis dës schwiereg Themen zur Sprooch ze bréngen ass esou sensibel, poetesch, philosophesch an awer och vun enger gewësser Liichtegkeet gepräägt, datt de Lieser sech net erschloe fillt, mee dozou encouragéiert gëtt sech mam Nora z´identifizéieren an sech selwer verschidde Froen ze stellen. Dobäi ass hie guer net opdränglech, mee vill méi verständnisvoll a mënschlech. DThematik Depressiounen ass natierlech vill ze kuerz gefaasst an de ganzen Inhalt gëtt dëser Krankheet absolut net gerecht. Mee dat ass och guer net dem Auteur seng Intentioun. Et ass a bleift e Roman, dee mat gutt doséiertem Déifgang zum Nodenke wëll ureegen an dem Lieser awer och ganz vill Fräiheete bei der Lecture léisst. Ech war begeeschtert vum Buch, hu mat Momenter selwer vill missten nodenken an hätt gären nach éiweg weidergelies.

"Die Mitternachtsbibliothek" ass op Däitsch bei Droemer-Knaur erauskomm.