Beim neie Buch "Für ein Leben" vum däitschen Auteur Ulrich Woelk kann een ouni Zweiwel vun engem Epos schwätzen: E Roman, dee sämtlech gesellschaftlech Theme behandelt, vu verschiddene Generatiounen erzielt, ganz ënnerschiddlech Charakteren optriede léisst a vill Contenu op eng ënnerhalsam Aart a Weis verschafft. Tiffany Saska huet d’Buch fir eis gelies.

28/09/2021 Buch vun der Woch

Am Mëttelpunkt vum Buch „Für ein Leben“ stinn zwou Fraen, déi net méi ënnerschiddlech kéinte sinn. D‘Nikisha genannt Niki wiisst als Kand vun zwee Hippien alles anescht wéi konventionell op. Seng Eltere liewen eng Zäit an der franséischer Stad Lourdes, mee d'Niki kënnt an Afghanistan op d’Welt, lieft ënner anerem an engem indeschen Ashram an a Mexiko a lant schliisslech, onerwaart a géint de Wëlle vu sengen Elteren, zu Berlin. Als éischt léiert de Lieser awer d’Lu mi genau kennen. Hatt verléiert seng kroatesch Mamm fréi un de Kriibs an de Papp erdränkt seng Suergen am Alkohol. Hatt kënnt fiert éischt bei engem Noper ënner, dee sech voll a ganz der Musek verschriwwen huet;  spéider wunnt et bei engem DDR-Flüchtling. Di zwou Fraen hunn offensichtlech näischt matenee ze dinn, mee en Zoufall bréngt di zwee zesummen a verännert esou munches.
 
Immens prägnant sinn di alleréischt Zeile vum Roman, di och schonn e bëssen dorop hindeiten, wouhin d’Rees geet. D’Niki ass mëttlerweil Doktesch zu Berlin an huet e männleche Patient, de Clemens, mat engem Hodenprobleem. Duerch eng medezinesch Feelbehandlung verléiert hie bal seng Fruchtbarkeet. Wat d’Niki do nach net weess: säin zukünftege Mann steet virun him. Ee vun de groussen Theeme vum Buch sinn dann och Bezéiungen an d‘Léift. D’Sexualitéit an all hire Forme gehéiert natierlech dozou a gëtt besonnesch intensiv behandelt. Et geet awer och ëm Relioun, Konscht a Musek an zu all Thema gëtt dann och en Nieweprotagonist agefouert. All dëst geschitt net onofhängeg vun der grad aktueller politescher Realitéit an esou spillt beispillsweis d’DDR Politik eng wichteg Roll. Ëmmer nees ginn aus verschiddenen Episoden aus de Liewe vun de Fraen erzielt, esou datt d’Handlung vun de 50er Jore bis haut spillt.
 
Mee wat verbënnt di zwou Fraen um Enn? Warscheinlech d’Sich no hirer Identitéit - en Theema, wat eis alleguer an der haiteger Zäit verbënnt. Et ass och net dem Woelk säin éischte Roman bei dem hie gesellschaftlech relevant Theme mat Hëllef vun Eenzelpersoune beschreiwe wëll. Dës Kéier péckt hien awer immens vill an säi Buch. Villäicht wär eng Opdeelung op e puer Bicher eng Iddi gewiescht. Dobäi ass alles immens gutt recherchéiert a beschriwwen an et mierkt een, datt hien sech ganz intensiv domat ausernee gesat huet. De Lieser kann sech awer mol liicht erschloe fillen. Esou goung et mir op alle Fall. Ech hunn e bëssi mi laang gebraucht fir an d’Buch eranzekommen. Der Geschicht hätt op der eng oder aner Plaz e puer Säite manner gehollef méi fléissend ze ginn. Aner Passagë gefale mir awer ganz gutt a ginn immens Loscht weiderzeliesen. Am Groussen a Ganzen ass „Für ein Leben“ e gelongent Buch, op dat de Lieser sech aloosse muss a fir di 630 Säiten en op der enger oder anerer Plaz, villäicht en e bësse mi laangen Otem brauch; mee et lount sech.