E klengt gréngt Bichelchen, mat de Secreten vu 5 Mënschen, wat déi Persounen um Enn genee dohinner bréngt, wou se solle sinn. Dat ass d'Kuerzfaassung vun enger Geschicht déi engem reegelrecht d'Häerz opmécht, an och eist Buch vun der Woch. "Montags bei Monica" heescht de Roman a gouf geschriwwe vun der Autorin Clare Pooley. D'Michèle Schons huet e gelies a kann e just wäermstens recommandéieren:

23112021 Buch vun der Woch Claire Pooley - Montags bei Monica

Schonn eleng de Cover huet mech immens begeeschtert. En ass schéi gestalt mat enger Kulisse vun engem Café, mat enger beige-rouder Markise. Eng Fra mat hirem Mupp sëtzt beim Bistrosdësch virum Café. E Mann mat engem grénge Buch am Café, en anere Mann dee mam Vëlo laanscht fiert an eng Katz déi uewen op der Markise läit. Wou ech bannen am Klappentext gelies hunn, dass de Roman un de Film "Love Actually" erënnert, war mer kloer, dass ech de Roman liese wollt. An ëm dat klengt gréngt Buch dréit sech och alles. E Buch wat vun enger Persoun bei déi aner wandert. Bannendra stinn éierlech Zeilen, déi déi Mënschen, déi se geschriwwen hu, soss kengem géingen uvertrauen. Jiddereen deen d'Buch fënnt, kann d'Geschichte vu senge Virgänger liesen an seng eegen derbäi schreiwen, ouni ze wësse, wien se als nächst liest. D'Monica fënnt d'Buch. "Projekt Aufrichtigkeit" steet vir um Cover an déi éischt Geschicht huet den Julian, e Kënschtler, sech vun der Séil geschriwwen:

"ICH BIN EINSAM. Mit dem Alter bin ich unsichtbar geworden. Was mich besonders trifft, weil ich früher immer im Mittelpunkt stand.“

Den Julian stellt a Fro wat passéiere géing, wa mer eise Géigeniwwer net méi beléie géifen, ma ëmmer éierlech wären. An um Enn schreift en:

„Das ist meine Geschichte. Bitte tun sie sich keinen Zwang an und werfen Sie sie in den Müll, wenn sie wollen. Oder geben Sie sich einen Ruck und schreiben Sie Ihre Wahrheit auf diesen Seiten nieder und reichen Sie das kleine Büchlein weiter. Vielleicht erleichtert Sie das ebenso wie mich.“

D'Monica kann net widderstoen a schreift seng eege Geschicht och dran. Iwwert säi Café, deen net esou gutt leeft wéi erwaart, iwwer de Wonsch no engem Partner an enger eegener Famill, ouni déi et sech net richteg als Fra fillt. Um Enn reest d'Bichelche ronderëm déi hallef Welt an ëmmer méi Mënsche schreiwen nieft hire Wouerechten och hir Hoffnungen an Dreem néier.

D'Autorin Clare Pooley huet 20 Joer an der Publicitéit geschafft, iert se sech em hir Famill gekëmmert huet. Doheem um Kichendësch schreift se hir Bicher an duerch hir eegen Erfarungen als Bloggerin, bréngt se hir Erzielunge mat eran a gestalt se doduerch immens authentesch. Si lenkt de Bléck op déi Problemer, déi jiddereen am Alldag begéint a liwwert eng formidabel Geschicht iwwer Frëndschaft, iwwer Gefiller an doriwwer dass een sech sollt Méi ginn, och mol hannert d'Fassade ze kucken. Grad an der momentaner Zäit kënnt esou e Wuelfill-Roman richteg, wou all Protagonist op seng Manéier seng Feeler a Schwächte weist, déi en eenzegaarteg maachen.

D'Täschebuch vum Clare Pooley huet 420 Säiten an ass beim Goldmann Verlag gedréckt ginn. D'Original-Editioun ass lescht Joer ënnert dem Titel "The authenticity project" op de Maart komm.