D’20.Joerhonnert war definitiv keng einfach Zäit fir de Vietnam. 1945 huet eng Hongersnout d'Land regéiert an ee Joer méi spéit ass de Krich tëschent Frankräich an de Viet Minh lassgaangen. Wéi wann dat net schonn duergeet huet d’Land sech 1954 och nach an zwee gespléckt – do war dunn e kommunisteschen Staat am Norden an eng kapitalistesch Republik am Süden. E knappt Joer duerno ass dunn och nach de bekannte Vietnamkrich ausgebrach. Eng Geschicht gefëllt mat Gewalt an Aarmut déi net nëmme Milliounen Doudeger gefuerdert huet, mä och onmoosseg vill Familljen zerbrach huet. Am Roman „Der Gesang der Berge“ léiere mir eng esou eng Famill kennen. D'Valeria Wiwinius huet d'Buch gelies.

14/12/2021 Buch vun der Woch - "Der Gesang der Berge"

Di éischt Säite vum Roman verschloen eis an di vietnamesesch Haaptstad Hanoi vun den 1970er Joren. Hei wunnt d’Huoung, zesumme mat senger Boma, a wäert drop dass de Rescht vun der Famill aus dem Krich zeréckkënnt. De Rescht vun der Famill – dat sinn dem jonke Meedche säi Papp a seng Monnien, déi alleguer wärend dem Vietnamkrich an d’Arméi agezu goufen a seng Mamm, déi duerch e gebrachent Land reest an der Hoffnung de Papp erëmzefannen. Wärenddeem zielt d’Boma dem Huong iwwer hiert eegent Liewen an d’Geschicht vun hirer Famill. Si selwer kënnt nämlech aus enger räicher Bauerefamill déi an engem klengen Duerf en Haff haten. Hei hunn si e glécklecht a rouegt Liewe gefouert hunn, bis hire Papp op brutal Aart a Weis ëmbruecht gouf. Zanterhier koum een Ongléck no deem aneren. Weder d’Hongersnout nach de Krich géint d'Fransousen, d’Japanesch Invasioun oder d’Landesreform an de 50er Joren hunn hir Famill verschount. A sou huet si mussen, zesumme mat hire 6 Kanner alles hannert sech loossen a fortlafen. Hir Destinatioun war Hanoi, wou d’Huoung och opgewuess ass an elo senger Boma nolauschtert bei hirer Liewensgeschicht wärend et drop wäert seng Elteren an de Rescht vun der Famill endlech erëmzegesinn.

„Der Gesang der Berge“ ass den engleschen Debut Roman vun der vietnamesescher Schrëftstellerin a Journalistin Nguyễn Phan Quế Mai. Erzielt gëtt d’Geschicht vu 4 Generatioune vun enger fiktiver Famill. Vue dass d’Geschicht sech awer op historesch Fakte baséiert an immens an den Detail geet, gëtt d’Tràn-Famill zu engem richtege Stellvertrieder fir e sou vill Famillje déi am 20.Joerhonnert am Vietnam gelieft hunn a fir déi Krich, Aarmut an Hongersnout laang Zäit un der Dagesuerdnung stoungen.

„Der Gesang der Berge“ zitt ee vun der éischter Säit un an eng Welt an an eng Zäit eran vun där een aus dëser Perspektiv vill ze seelen (wann iwwerhaapt) héieren huet. Deemno ass et och kee Wonner dass de Roman schonn eng ganz Rëtsch Präisser gewonnen huet, wéi zum Beispill bei den „International Book Awards 2021“ oder der „Washington Independent Review of Books“.

De Roman „Der Gesang der Berge“ ass den 10.Oktober 2021 op Däitsch beim Suhrkamp Insel Verlag erauskomm.