Mir proposéieren iech haut als Buch vun der Woch, den neie Roman "Das Glück auf der letzten Seite" vun der franséischer Schrëftstellerin Cathy Bonidan. E Feel-Good-Buch, eng spannend Sich, no engem Auteur, a fir déi déi d'Bicher gären hunn, ass et eng Aart Libeserklärung un d'Liesen.

25/10/2022 Buch vun der Woch: Das Glück auf der letzten Seite

D'Anne-Lise kann net gutt schlofen, ouni virdrun e puer Zeile gelies ze hunn. Op der Sich no Lektüre, fënnt se am Tirang vun engem Hotel an der Normandie e Manuskript. Si huet keng Anung wéi déi geschriwwe Wieder hiert d'Liewen op d'Kopp dréien. Op der Sich no deem, deen se geschriwwen huet, kënnt se mam rabbelkäppege Sylvestre a Kontakt, hie gëtt zou, dass e virun 30 Joer déi éischt Hallschent geschriwwen huet. Ma wéi ass de Roman an den Hotel komm? Wou war en déi lescht 30 Joer, a wien huet de Schluss geschriwwen? Eng spannend Rees fänkt un. Scho geschwë mierkt een, dass dee mysteriéisen Text, d'Liewe vun all deenen, déi e gelies hunn, an eng nei Richtung lenkt. "Das Glück auf der letzten Seite" ass e Bestseller aus Frankräich, e Libesbréif u Bréiwer, un d'Léift, un d'Liewen an un d'Gewëssheet, dass e Buch e Liewe verännere kann. 

Déi al a vergiesse Konscht vun der schrëftlecher Korrespondenz erwächt hei am Roman nees zum Liewen. D'Buch besteet nämlech aus lauter Bréiwer. Bréiwer déi immens schéi formuléiert sinn, mat dausend niewesächleche Bemierkungen an enger ganzer Partie P.s. a P.p.s. Schonn d'Liesprouf huet ee begeeschtert an un d'70er an d'80er erënnert. Stéck fir Stéck gëtt een d'Liewensgeschichte vun deene verschiddene Leit gewuer, déi sech zesummen op eng Rees maachen, fir e Wee vun engem Manuskript ze suivéieren. Um Ufank nach e bësse lues, ma no an no gëtt een och iwwer d'Motivatioun an d'Vergaangenheet vun deenen eenzelen Bréiffrënn gewuer a kann nokucke wéi eng Gemeinschaft entsteet.     

Déi franséisch Schrëftstellerin Cathy Bonidan schafft als Léierin zu Vannes an der Bretagne, a schreift zanter hirem 14te Liewensjoer. Hiert Buch war a Frankräich ënnert dem Originaltitel "Chambre 128" e richtege Succès a gëtt grad op e puer Sproochen iwwersat.